الەۋمەتتىك جەلىدە الماتىداعى كوپقاباتتى ۇيلەردىڭ ءبىرىنىڭ 13-قاباتىنان قۇلاپ كەتكەن 12 جاستاعى قىزدىڭ ءولىمى تۋرالى اقپارات تارالۋدا، - دەپ حابارلايدى "ادىرنا" ۇلتتىق پورتالى.
باسىلىمنىڭ مالىمەتىنشە، وقۋشى قىز قوسىمشا ساباققا بارۋ ءۇشىن ۇيدەن شىعىپ كەتكەن. الايدا ول 13 قاباتتى تۇرعىن ۇيگە كوتەرىلگەن.
الماتى پوليتسيا دەپارتامەنتى قىزدىڭ ءولىمىن راستادى.
«وسى فاكتى بويىنشا بوستاندىق اۋداندىق پوليتسيا ءبولىمى قىلمىستىق ءىس قوزعادى»، - دەپ حابارلادى دەپارتامەنتتىڭ ءباسپاسوز قىزمەتى.
سونداي-اق پوليتسەيلەر ينتەرنەتتە مارقۇم قىزدىڭ قاۋىپتى «كوگىلدىر كيت» ويىنىن وينادى دەگەن اقپاراتتىڭ شىندىققا جاناسپايتىنىن اتاپ ءوتتى.
«قايتىس بولعان بالانىڭ قاۋىپتى ويىندار ويناپ، ءوز-وزىنە قول جۇمساۋ تۋرالى جازبا قالدىرعانى تۋرالى الەۋمەتتىك جەلىلەردە تاراعان اقپاراتتىڭ شىندىققا جاناسپايتىنىن حابارلايمىز، الماتى قالالىق پوليتسيا دەپارتامەنتى كەز كەلگەن ادام جالعان اقپارات تاراتقانى ءۇشىن قىلمىستىق جاۋاپكەرشىلىككە تارتىلاتىنىن ەسكەرتەدى»، - دەپ حابارلادى ءباسپاسوز قىزمەتى.
