رەسەي شەتەلدىكتەردىڭ ەلگە كىرۋىنە قاتىستى ەرەجەلەردى وزگەرتتى. وزگەرىس قازاقستان ازاماتتارىنا دا اسەر ەتەدى. بۇل تۋرالى رەسەي ىشكى ىستەر مينيسترلىگىنە سىلتەمە جاساي وتىرىپ، «كوممەرسانت» باسىلىمى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سۇيەنسەك، رەسمي ماسكەۋ شەتەل ازاماتتارىن ەلگە كىرگىزۋ كەزىندە فوتو جانە ساۋساق ىزدەرىمەن سايكەستەندىرۋ بويىنشا پيلوتتىق جوبا باستاعان. پيلوتتىق جوبا باستاپقى كەزەڭدە ماسكەۋ اۋەجايىندا جانە قازاقستانمەن شەكاراداعى ورىنبور وبلىسىندا ورنالاسقان ماشتاكوۆو اۆتوموبيل وتكىزۋ پۋنكتىندە ىسكە اسىرىلادى.
«ورىنبور وبلىسىندا قازاقستانمەن شەكارادا ورنالاسقان ماشتاكوۆو اۆتوموبيل وتكىزۋ پۋنكتىندە 2024 جىلدىڭ 1 جەلتوقسانىنان باستاپ رەسەيگە كەلەتىن شەتەلدىك ازاماتتاردى فوتو جانە داكتيلوسكوپيالىق سايكەستەندىرۋ (ساۋساق ىزدەرى) بويىنشا ەكسپەريمەنتتى پيلوتتىق جوبا باستالادى. پروتسەدۋرا ماسكەۋدەگى اۋەجايلاردا دا قولدانىلادى»، – دەپ حابارلادى «كوممەرسانت».
پيلوتتىق جوبا ازىرگە ەكسپەريمەنتالدى تۇردە جۇرگىزىلەدى. تەستىلەۋدەن وتكەننەن كەيىن، رەسەي ىشكى ىستەر مينيسترلىگى مەن فەدەرالدى قاۋىپسىزدىك قىزمەتى جوبانى بارلىق شەكارالىق ايماقتا قولدانۋدى جوسپارلاعان.
قولدانىستاعى زاڭناماعا سايكەس، رەسەي فەدەراتسياسىنا اقشا تابۋ ءۇشىن كەلگەن شەتەلدىكتەر كىرگەن كۇننەن باستاپ كۇنتىزبەلىك 30 كۇن ىشىندە نەمەسە جۇمىسقا رۇقسات الۋ ءۇشىن ءوتىنىش بەرگەن كەزدە ساۋساق ءىزىن تىركەۋدەن جانە سۋرەتكە تۇسىرۋدەن ءوتۋى كەرەك. ۇزاق مەرزىمگە (90 كۇننەن استام) باسقا ماقساتتارعا كەلگەندەر مۇنى كىرگەن كۇننەن باستاپ 90 كۇنتىزبەلىك كۇن ىشىندە جاساي الادى.
رەسەي فەدەراتسياسىندا جۇمىسقا رۇقساتسىز نەمەسە پاتەنتسىز جۇمىس ىستەۋگە قۇقىعى بار شەتەلدىكتەر ەڭبەك شارتى نەمەسە جۇمىستى ورىنداۋعا ازاماتتىق-قۇقىقتىق شارت جاساسقان كۇننەن باستاپ 30 كۇنتىزبەلىك كۇن ىشىندە، بىراق كۇنتىزبەلىك 90 كۇننەن كەشىكتىرمەي ساۋساق ءىزىن جانە سۋرەتكە تۇسىرۋدەن ءوتۋى كەرەك.
