ءماجىلىس دەپۋتاتى نارتاي ارالبايۇلى قورعانىس ءمينيسترى رۋسلان جاقسىلىقوۆقا اسكەردەگى قازىرگى جاعدايعا قاتىستى ساۋال جولدادى، - دەپ حابارلايدى "ادىرنا" ۇلتتىق پورتالى.
دەپۋتاتتىڭ ايتۋىنشا، كەيىنگى ءۇش جىلدا قازاقستاندا 270 اسكەري قىزمەتكەر قايتىس بولعان، ال سوڭعى ءتورت جىلدا اسكەردە 86 سۋيتسيد تىركەلگەن، 20 اسكەري ادام ءوز-وزىنە قول سالۋعا وقتالعان.
"بۇل – اسكەري پروكۋراتۋرا مالىمدەگەن رەسمي سان. 2023 جىلعى تامىزدا اسكەري بولىمشەلەردىڭ بىرىندە كوماندير اسكەرگە جاڭادان كەلگەن ساربازدى ورىندىقپەن ۇرىپ، سوققىعا جىققان. ارتى نەمەن ءبىتتى دەيسىز عوي، ءىس تاراپتاردىڭ بىتىمگە كەلۋىمەن جابىلىپ قالعان. 2024 جىلدىڭ ماۋسىم ايىندا جامبىل وبلىسىنىڭ ءبىر اسكەري بولىمشەسىندە اسكەرگە كەلگەنىنە 1-اق اي بولعان سارباز ەس-ءتۇسسىز جانساقتاۋ بولىمىنە تۇسكەن" دەيدى دەپۋتات.
سونىمەن قاتار، ول بەس اي بويى كومادا جاتقان سارباز ەربايان مۇحتاردىڭ جاعدايىن دا اتاي كەتتى:
"ال تاياۋدا ورىن العان جاعداي بۇكىل وتانداسىمىزدىڭ اشۋ-ىزاسىن تۋعىزدى. ۇلتتىق ۇلاننىڭ جاۋىنگەرى ەربايان مۇحتار باسىنان العان جاراقاتتان بەس اي بويى ەس-ءتۇسسىز جاتىر. جاۋاپتىلار «ەربايان دارەتحاناعا قۇلاپ، جاراقاتتاندى» دەيدى. بۇعان كىم سەنەدى؟ جاراقاتتىڭ سالدارىنان ساربازدىڭ باسىنىڭ جارتىسىن الىپ تاستاۋعا تۋرا كەلگەن. ەندى وعان تۇراقتى كۇتىم قاجەت. قازىر اتا-اناسى ەرباياندى شەتەلگە ەمگە اكەتۋگە قام جاساۋدا" دەپ قوستى ول.
سونداي-اق، سارسەنعاليەۆ اسكەري بولىمدەردە ورناتىلعان كامەرالارعا قاتىستى تالاپ قويدى.
"بىلتىر قورعانىس مينيسترلىگى اسكەري بولىمدەردە 50 مىڭنان استام بەينەكامەرا بار دەدى. ونداعى جازبالار قايدا؟ الدە ەربايان سەكىلدى باۋىرلارىمىز جاراقات العاندا الگى كامەرالار تەرىس قاراپ قالدى ما؟ اسكەردەگى الىمجەتتىك ماسەلەسىن "امانات" پارتياسى 2022 جىلى كوتەرگەن بولاتىن. الايدا جاعداي تۇزەلمەك تۇگىلى، ۋشىعىپ كەتتى دەسە دە بولادى. ساربازداردىڭ ارميادا جاراقات الىپ، قايتىس بولۋى توقتار ەمەس. وسى تۇستا تاعى ءبىر تۇيتكىل بار، اسكەري قىزمەتكەرلەردىڭ الەۋمەتتىك جاعدايى تومەن. ولاردىڭ ايلىعى شايلىعىنا جەتپەيدى، سەبەبى سوڭعى رەت اسكەريلەردىڭ جالاقىسى 2008 جىلى عانا كوتەرىلگەن. ۋاعىندا بەرىلگەن الەۋمەتتىك قولداۋ شارالارىنىڭ ءبىرازىنان شەت قالعان. بۇل - جاعدايدى تۇزەتۋ كەزەك كۇتتىرمەيتىن ماسەلە", - دەيدى ول.
دەپۋتات وسىلاردى اتاي كەلە بىرنەشە ۇسىنىس ءبىلدىردى.
"جوعارىدا ايتىلعان جاعدايلاردى ەسكەرىپ سىزدەن كەلەسى شارالاردى قولعا الۋدى ۇسىنامىن. ەلىمىزدىڭ ارمياسىنداعى اتالعان كەلەڭسىزدىكتى تىيۋ جانە الدىن الۋ بويىنشا ناقتى شارالاردى قابىلداۋدى، اسكەريلەردىڭ الەۋمەتتىك جاعدايىن جاقسارتۋعا باعىتتالعان جوبالادى قولعا الىپ، ولاردىڭ ىسكە اسۋىن جەدەلدەتۋدى ۇسىنامىن" دەدى دەپۋتات.
