اقش پرەزيدەنتى دجو بايدەن مەن ۇلىبريتانيا پرەمەر-ءمينيسترى كير ستارمەر جۇما كۇنى اق ۇيدە وتكەن كەزدەسۋدە رەسەي مەن ۋكراينا اراسىنداعى قاقتىعىستا تولىقتاي ۋكراينانى قولدايتىنىن راستادى، - دەپ حابارلايدى "ادىرنا" ۇلتتىق پورتالى "امەريكا داۋىسى" راديوسىنا سىلتەمە جاساپ.
اقش-بريتان كەلىسسوزدەرىنىڭ كۇن تارتىبىندە كيەۆكە رەسەي اۋماعىنا تەرەڭ سوققى بەرۋ ءۇشىن الىس قاشىقتىقتاعى زىمىرانداردى قولدانۋعا رۇقسات بەرۋ ماسەلەسى قوزعالدى. ۋكراينا پرەزيدەنتى ۆلاديمير زەلەنسكي ۆاشينگتون مەن لوندون باسشىلارىن ءدال وسىلاي جاساۋعا شاقىرادى.
«رەسەي پرەزيدەنتى ۆلاديمير پۋتين ۋكراينامەن سوعىستا جەڭىسكە جەتە المايدى»، - دەدى بايدەن كەزدەسۋدە.
ەكى ەلدىڭ كوشباسشىلارى «يران مەن سولتۇستىك كورەيانىڭ رەسەيگە قارۋ-جاراق جەتكىزۋى مەن قىتايدىڭ رەسەيدىڭ اسكەري-ونەركاسىپ كەشەنىن قولداۋىنا» قاتتى الاڭداۋشىلىق ءبىلدىردى.
بۇعان قوسا، اق ءۇيدىڭ ءباسپاسوز قىزمەتى بايدەن مەن كرامەر ءيزرايلدىڭ قاۋىپسىزدىگىنە، اتىستى توقتاتۋ تۋرالى كەلىسىمگە جەدەل قول جەتكىزۋگە جانە كەپىلگە الىنعانداردى بوساتۋعا دەگەن مىزعىماس ۇستانىمدارىن قۋاتتادى دەپ حابارلادى. ەكى كوشباسشى دا يران قولدايتىن حۋسيلەردىڭ قىزىل تەڭىزدەگى ساۋدا كەمەلەرىنە جاساعان شابۋىلدارىن ايىپتادى.
سەيسەنبى كۇنى ەرتەرەك پرەزيدەنت بايدەن ۋكراينانىڭ ۇزاق قاشىقتىققا ۇشاتىن زىمىراندار تۋرالى وتىنىشىمەن «جۇمىس ىستەپ جاتقانىن» ايتتى. بەيسەنبى كۇنى رەسەي پرەزيدەنتى ۆلاديمير پۋتين مۇنداي قارار ناتو-نىڭ رەسەيمەن سوعىسىپ جاتقانىن بىلدىرەدى دەپ مالىمدەدى.
