AQSh prezıdenti Djo Baıden men Ulybrıtanııa premer-mınıstri Kır Starmer juma kúni Aq úıde ótken kezdesýde Reseı men Ýkraına arasyndaǵy qaqtyǵysta tolyqtaı Ýkraınany qoldaıtynyn rastady, - dep habarlaıdy "Adyrna" ulttyq portaly "Amerıka daýysy" radıosyna silteme jasap.
AQSh-Brıtan kelissózderiniń kún tártibinde Kıevke Reseı aýmaǵyna tereń soqqy berý úshin alys qashyqtyqtaǵy zymyrandardy qoldanýǵa ruqsat berý máselesi qozǵaldy. Ýkraına prezıdenti Vladımır Zelenskıı Vashıngton men London basshylaryn dál osylaı jasaýǵa shaqyrady.
«Reseı prezıdenti Vladımır Pýtın Ýkraınamen soǵysta jeńiske jete almaıdy», - dedi Baıden kezdesýde.
Eki eldiń kóshbasshylary «Iran men Soltústik Koreıanyń Reseıge qarý-jaraq jetkizýi men Qytaıdyń Reseıdiń áskerı-ónerkásip keshenin qoldaýyna» qatty alańdaýshylyq bildirdi.
Buǵan qosa, Aq úıdiń baspasóz qyzmeti Baıden men Kramer Izraıldiń qaýipsizdigine, atysty toqtatý týraly kelisimge jedel qol jetkizýge jáne kepilge alynǵandardy bosatýǵa degen myzǵymas ustanymdaryn qýattady dep habarlady. Eki kóshbasshy da Iran qoldaıtyn hýsılerdiń Qyzyl teńizdegi saýda kemelerine jasaǵan shabýyldaryn aıyptady.
Seısenbi kúni erterek prezıdent Baıden Ýkraınanyń uzaq qashyqtyqqa ushatyn zymyrandar týraly ótinishimen «jumys istep jatqanyn» aıtty. Beısenbi kúni Reseı prezıdenti Vladımır Pýtın mundaı qarar NATO-nyń Reseımen soǵysyp jatqanyn bildiredi dep málimdedi.
