استانادا ەلوردالىق مادەنيەت باسقارماسىنىڭ بۇرىنعى باسشىسى بولات ماجاعۇلوۆ ۇستالدى، دەپ حابارلايدى “ادىرنا” ۇلتتىق پورتالى كوزاچكوۆ Offside Telegram ارناسىنا سىلتەمە جاساپ.
ول 2016 جىلى كۇن سۋبۇرقاعىنىڭ قۇرىلىسى كەزىندە ۇرلىق جاسادى دەگەن كۇدىككە ىلىنگەنى حابارلاندى.
Kozachkov offside Telegram ارناسىنىڭ جازۋىنشا، ول نىساننىڭ اشىلۋى ەكس-پرەزيدەنت نۇرسۇلتان نازارباەۆتىڭ تۋعان كۇنىنە ورايلاستىرىلعان. الايدا 2017 جىلدان باستاپ سۋبۇرقاق اپاتتى جاعدايدا تۇر.
تەرگەۋ بارىسىندا جوباعا 1 ميلليارد تەڭگەدەن اسا قاراجات جۇمسالعانى انىقتالدى. سونىمەن قاتار مادەنيەت باسقارماسى سۋبۇرقاق قۇرىلىسىن مەملەكەتتىك ساتىپ الۋ ءراسىمىنسىز جۇرگىزگەن. ونىڭ جوبا-سمەتالىق قۇجاتتاماسى بولماعان جانە مەملەكەتتىك ساراپتامادان وتپەگەن.
كەيىن بەلگىلى بولعانداي، نىسان ساپاسىز ماتەريالداردان جاسالعاندىقتان، كوپ ۇزاماي بۇزىلىپ قالعان.
تەرگەۋگە جاۋاپتى قارجى مونيتورينگى اگەنتتىگىنىڭ مالىمەتىنشە، بۇل ىسكە سول كەزدەگى استانا قالاسى مادەنيەت باسقارماسى باسشىسىنىڭ تىكەلەي قاتىسى بار.
تەرگەۋ اياسىندا بولات ماجاعۇلوۆتىڭ 3 كوممەرتسيالىق نىسانىنا، 2 اۆتوتۇراعىنا جانە پرەميۋم-كلاستى ۇيدەگى پاتەرىنە شەكتەۋ قويىلدى.
بۇل ءىس بويىنشا كۇدىكتىلەر قاتارىندا سۋبۇرقاقتى سالعان مەردىگەر كومپانيالاردىڭ وكىلدەرى دە بار. ولاردىڭ جالپى قۇنى 500 ميلليون تەڭگەدەن اساتىن مۇلكى تاركىلەندى.
