قوستاناي وبلىسىنداعى مەكەمەلەردىڭ بىرىندە قاماۋدا وتىرعان ادامنىڭ جازا مەرزىمى العاش رەت قىلمىستىق كودەكستىڭ جاڭا بابى بويىنشا كوبەيتىلدى، - دەپ حابارلايدى “ادىرنا” ۇلتتىق پورتالى قىلمىستىق اتقارۋ جۇيەسى كوميتەتىنىڭ (قاجك) ءباسپاسوز قىزمەتىنە سىلتەمە جاساپ.
قوستاناي وبلىسىندا كىسى ولتىرگەنى ءۇشىن جازاسىن وتەپ جاتقان سوتتالۋشى بەينەباقىلاۋ كامەراسىن سىندىرىپ تاستاعان. بۇعان دەيىن تەمىر تورداعى تارتىپسىزدىگى ءۇشىن 36 رەت ەسكەرتۋ العان. قوستاناي وبلىسى بويىنشا قىلمىستىق-اتقارۋ جۇيەسى دەپارتامەنتى كامەرانىڭ سىنعانىنا قاتىستى كەلتىرىلگەن شىعىندى وتەۋ تۋرالى تالاپ ارىزبەن جۇگىندى. سونداي-اق بەينەباقىلاۋ كامەراسىنىڭ زاقىمدانۋى بويىنشا قىلمىستىق ءىس قوزعالدى.
«سوتتالۋشى ءوز كىناسىن مويىنداپ، ونىڭ وكىلدەرى 111 مىڭ 400 تەڭگە كولەمىندەگى شىعىندى وتەپ بەردى، ول ءوز ءىسىن «جۇيكەم سىر بەردى” دەپ ءتۇسىندىردى. بەينەباقىلاۋ كامەراسىن بۇلدىرگەنى ءۇشىن وعان ءبىر جىلعا باس بوستاندىعىنان ايىرۋ جازاسى تاعايىندالدى، بۇرىنعى ۇكىم بويىنشا وتەلمەگەن جازاسىن ءىشىنارا قوسىپ، سەگىز جىل باس بوستاندىعىنان ايىرۋ جازاسىن قاتاڭ رەجيمدەگى مەكەمەدە وتەۋ ءۇشىن تۇپكىلىكتى جازا تاعايىندالدى»، - دەپ حابارلادى تۇزەۋ مەكەمەسىنەن.
بۇعان دەيىن مەملەكەت باسشىسىنىڭ تاپسىرماسىمەن تۇزەۋ مەكەمەلەرىندەگى بەينەكامەرالاردى بۇلدىرگەنى ءۇشىن قىلمىستىق جاۋاپكەرشىلىك ەنگىزىلگەن بولاتىن. باپتىڭ سانكتسياسىندا التى ايدان جەتى جىلعا دەيىن باس بوستاندىعىنان ايىرۋ جازاسى قاراستىرىلعان.
