Qostanaı oblysyndaǵy mekemelerdiń birinde qamaýda otyrǵan adamnyń jaza merzimi alǵash ret Qylmystyq kodekstiń jańa baby boıynsha kóbeıtildi, - dep habarlaıdy “Adyrna” ulttyq portaly Qylmystyq atqarý júıesi komıtetiniń (QAJK) baspasóz qyzmetine silteme jasap.
Qostanaı oblysynda kisi óltirgeni úshin jazasyn ótep jatqan sottalýshy beınebaqylaý kamerasyn syndyryp tastaǵan. Buǵan deıin temir tordaǵy tártipsizdigi úshin 36 ret eskertý alǵan. Qostanaı oblysy boıynsha Qylmystyq-atqarý júıesi departamenti kameranyń synǵanyna qatysty keltirilgen shyǵyndy óteý týraly talap aryzben júgindi. Sondaı-aq beınebaqylaý kamerasynyń zaqymdanýy boıynsha qylmystyq is qozǵaldy.
«Sottalýshy óz kinásin moıyndap, onyń ókilderi 111 myń 400 teńge kólemindegi shyǵyndy ótep berdi, ol óz isin «júıkem syr berdi” dep túsindirdi. Beınebaqylaý kamerasyn búldirgeni úshin oǵan bir jylǵa bas bostandyǵynan aıyrý jazasy taǵaıyndaldy, burynǵy úkim boıynsha ótelmegen jazasyn ishinara qosyp, segiz jyl bas bostandyǵynan aıyrý jazasyn qatań rejımdegi mekemede óteý úshin túpkilikti jaza taǵaıyndaldy», - dep habarlady túzeý mekemesinen.
Buǵan deıin memleket basshysynyń tapsyrmasymen túzeý mekemelerindegi beınekameralardy búldirgeni úshin qylmystyq jaýapkershilik engizilgen bolatyn. Baptyń sankııasynda alty aıdan jeti jylǵa deıin bas bostandyǵynan aıyrý jazasy qarastyrylǵan.
