Air Astana اۋە كومپانياسىنان حالىق ءارتىسى بيبىگۇل تولەگەنوۆاعا دورەكىلىك تانىتقانى ءۇشىن كەشىرىم سۇراۋ تالاپ ەتىلۋدە، دەپ حابارلايدى "ادىرنا" ۇلتتىق پورتالى.
"2024 جىلدىڭ 3 قىركۇيەگىندە ساعات 10:30-دا استانادان الماتىعا ۇشاتىن ەير استانا 852 رەيسىندە قوعامنىڭ قايدا بارا جاتقانىن ويلاندىراتىن ءبىر جاعداي بولدى. كسرو حالىق ءارتىسى جانە قازاقستاننىڭ حالىق ءارتىسى، اڭىزعا اينالعان ءانشى بيبىگۇل تولەگەنوۆا Air Astana اۋە كومپانياسىنىڭ قىزمەتكەرى تاراپىنان دورەكىلىك پەن قۇرمەتسىزدىككە تاپ بولدى. بيبىگۇل احمەتقىزىن مۇگەدەكتەر ارباسىندا ۇشاق بورتىنا وتكىزبەك بولعاندا اۋە كەمەسىنە ءوتۋدى باقىلايتىن قىزمەتكەر توقتاتىپ، ارباداعى جولاۋشىلاردىڭ ءبىرىنشى بولىپ نەمەسە ەڭ سوڭعى جولاۋشى وتكەننەن كەيىن عانا ءوتۋى كەرەكتىگىن دورەكى تۇردە ەسكەرتكەن»، - دەپ جازدى لەكا ساۆەلەۆا Facebook پاراقشاسىندا.
اۋە كومپانياسىنىڭ قىزمەتكەرلەرىنە بيبىگۇل احمەتقىزىنىڭ ومىرتقاسىندا اۋىر اقاۋ بار ەكەنى حابارلاندى. ارباعا تاڭىلعان اكتريسانى قىزى ەرتىپ كەلە جاتقاندا، ولاردى كەنەتتەن Air Astanا قىزمەتكەرى توقتاتىپ، ارباداعى جولاۋشىلار ءبىرىنشى بولىپ وتىرىپ ۇلگەرۋى كەرەك نەمەسە سوڭعى جولاۋشى وتكەنشە كۇتۋ كەرەك دەپ قاتتى ەسكەرتكەن.
وسىدان كەيىن بيبىگۇل احمەتقىزى قىزمەتكەرگە ءوزىنىڭ استانا قالاسىنىڭ قۇرمەتتى ازاماتى ەكەنىن جانە وعان قانشا قاتال ەرەجە بولسا دا، ەرەكشە جاعداي جاساۋعا لايىق ەكەنىن ايتتى. كومپانيا قىزمەتكەرى بۇنىڭ بارىنەن حاباردار ەكەنىن، بىراق ەرەجە ادامداردىڭ مارتەبەسىنە، جاسىنا نەمەسە جاعدايىنا قاراماستان، بارىنە بىردەي قولدانىلاتىنىن ايتتى.
"كومپانيانىڭ قارتتاردى، اسىرەسە ەلىمىزدى حالىقارالىق ارەنادا تانىتقان تۇلعالاردى قۇرمەتتەۋدى قىزمەتكەرلەرگە نەگە ۇيرەتپەگەنىن بىلگىمىز كەلەدى؟ نەگىزگى قۇرمەت-ادەپ ەرەجەسى قايدا؟ نەلىكتەن وسىنداي ادامدارعا كليەنتتەرمەن جۇمىس ىستەۋگە رۇقسات ەتىلەدى؟ ۇلتتىق تاسىمالداۋشى كومپانيا قىزمەتكەرلەرىنىڭ مۇنداي مىنەز-قۇلقى ماسقارا جاعداي ەكەنى انىق. Air Astana, بارشامىزدىڭ سۇيىكتى تۇلعامىز بيبىگۇل احمەتقىزى تولەگەنوۆاعا قاتىستى سىزدەردىڭ تۇسىنىكتەمەلەرىڭىز بەن كەشىرىمدەرىڭىزدى كۇتەمىز!»، - دەپ ۇندەۋ جاسادى لەكا ساۆالەۆا.
ال اۋە كومپانياسى بۇل جاعدايدى قاۋىپسىزدىك ءۇشىن بولعانىن ايتادى.
«بيبىگۇل احمەتقىزى تولەگەنوۆاعا دەگەن قۇرمەتىمىز ەرەكشە! Air Astana اۋە كومپانياسى ءۇشىن قاۋىپسىزدىك باستى ورىندا. اۋە قاۋىپسىزدىگىنىڭ حالىقارالىق ەرەجەلەرىنە ساي، اربادا وتىرعان جولاۋشىلار ۇشاققا ەڭ ءبىرىنشى بولىپ نەمەسە ەڭ سوڭىندا مىنەدى. ياعني، وسى ەرەجە جولاۋشىلاردىڭ ءبارى ءۇشىن ىڭعايلى، سونداي-اق، تەرمينالدان ەۆاكۋاتسيالاۋ ەرەجەلەرىنە ساي. ءبىزدىڭ قولىمىزداعى اقپاراتقا سۇيەنسەك، قازاقستاننىڭ حالىق ءارتىسى بيبىگۇل تولەگەنوۆا مەن ونىڭ قىزى جولاۋشىلار ۇشاققا مىنە باستاعاندا كەلگنەن. سوندىقتان، اۋە كومپانياسىنىڭ اگەنتى جولاۋشىلار ءمىنىپ العانشا كۇتە تۇرىڭىزدار دەگەن. اۋە كومپانياسى وسى وقيعانىڭ ورىن العانىنا قاتتى وكىنەدى جانە قىزمەت ساپاسىن جاقسارتۋ ءۇشىن قوسىمشا تەكسەرىس جۇرگىزەدى»، - دەپ جازعان كومپانيا.
