برازيليادا 62 ادامنىڭ ءومىرىن جالماعان ۇششاق اپاتى تۋرالى تىڭ دەرەكتەر بەلگىلى بولا باستادى، دەپ حابارلايدى "ادىرنا" ۇلتتىق پورتالى.
9 تامىز كۇنى بورتىندا جولاۋشىلارى بار ۇشاق اپاتقا ۇشىراپ، 62 ادام قايتىس بولعان ەدى. سول ساتتە ۇۇشاقتى باسقارعان ۇشقىشتىڭ ەسىمى بەلگىلى بولدى. ول بۇرىن «ەير استانادا» جۇمىس ىستەگەن.
شەتەلدىك باق مالىمەتىنشە، برازيليالىق Voepass اۋە كومپانياسىنا تيەسىلى ATR-72-500 ۇشاعى ۆينحەدو قالاسىنا جاقىن جەردە اپاتقا ۇشىرادى. 35 جاستاعى كاپيتان دانيلو سانتوس رومانو ۇشقىش بولعان.
«35 جاستاعى كاپيتان دانيلو سانتوس رومانو جۇما كۇنى برازيليادا بولعان ورتتەن كەيىن انىقتالعان العاشقى قۇربان بولدى»، - دەلىنگەن شەتەلدىك باق-تا.
«ەير استانا» وكىلدەرىنەن الىنعان اقپاراتقا سايكەس، اپاتقا ۇشىراعان اۋە كەمەسىنىڭ كومانديرى 2019 جىلدىڭ جەلتوقسانىنان 2020 جىلدىڭ ناۋرىز ايىنا دەيىن قازاقستاندىق اۋە كومپانياسىندا جۇمىس ىستەگەن. ول Airbus A320 ۇشاعىندا ەكىنشى ۇشقىش قىزمەتىن اتقارعان. الايدا ونىڭ وسى كەزەڭدەگى جالپى ۇشۋ ۋاقىتى نەبارى 25 ساعاتتى قۇراعان.
«وقيعاعا قاتىسى بار اۋە كەمەسىنىڭ كومانديرى 2019 جىلدىڭ جەلتوقسانىنان 2020 جىلدىڭ ناۋرىزىنا دەيىن Airbus A320 ۇشاعىندا ەكىنشى ۇشقىش رەتىندە ۇشتى. «ەير استانا» كومپانياسىمەن 2020 جىلدىڭ ماۋسىمىندا رەيس ۋاقىتى نەبارى 25 ساعاتتى قۇرادى»، - دەلىنگەن حابارلامادا.
تەرگەۋشىلەر ۇشاقتاعى قارا جاشىكتى تەكسەرۋدە. وندا اپاتقا ءبىر مينۋت قالعاندا ەكىنشى ۇشقىشقا بيىكتىكتىڭ كۇرت تومەندەگەنى تۋرالى دابىل تۇسكەنى كورسەتىلگەن. «قارا جاشىكتەن» الىنعان مالىمەتتەردى دەكودتاۋ بويىنشا ول كومانديرگە قوزعالتقىشتىڭ قۋاتىن ارتتىرۋ قاجەتتىلىگى تۋرالى ەسكەرتىلگەنىمەن ۇشاقتى قايتا قالپىنا كەلتىرۋ مۇمكىن بولماعان.
جەرگىلىكتى باق حابارلاۋىنشا، ۇشقىشتار بايلانىس ۇزىلگەنگە دەيىن توتەنشە جاعداي نەمەسە قولايسىز اۋا-رايى تۋرالى حابارلاماعان. تەرگەۋشىلەر اپاتتىڭ سەبەبىن انىقتاۋدى جالعاستىرۋدا.
