اقتاۋ ماڭىندا اپاتقا ۇشىراعان "باكۋ-گروزنىي" باعىتىنداعى ازەربايجان ۇشاعىنىڭ ەكيپاجى تۋرالى قوسىمشا مالىمەتتەر بەلگىلى بولدى، دەپ حابارلايدى "ادىرنا" ۇلتتىق پورتالى.
اۋە كەمەسىنىڭ كاپيتانى رەسەي ازاماتى يگور كشنياكين بولعان. ول 15 مىڭ ساعاتتان استام ۇشۋ تاجىريبەسى بار بىلىكتى مامان. ونىڭ ىشىندە 11 200 ساعات كاپيتان رەتىندە ۇشقان. رەسەيلىك اقپارات قۇرالدارىنىڭ مالىمەتىنشە، كشنياكين اۋەدەگى جاعدايعا بايلانىستى اقتاۋداعى قوسالقى اۋەجايعا قونۋ تۋرالى شەشىم قابىلداعان.
ۇشاقتى باسقارعان ۇشقىش الەكساندر كاليانينوۆ – باكۋ ەۋروپالىق ليتسەيىنىڭ تۇلەگى. جاس مامان قىزمەت بارىسىندا ەرەكشە جاۋاپكەرشىلىك تانىتىپ، ونداعان ادامنىڭ ءومىرىن ساقتاپ قالعان.
ازەربايجاندىق باق كاليانينوۆتى ليتسەيدەگى ۇزدىك تۇلەكتەردىڭ ءبىرى دەپ اتاپ ءوتتى. قايعىلى وقيعادان كەيىن ونىڭ تۇلەپ ۇشقان وقۋ ورنى ۇشقىشتىڭ وتباسى مەن جاقىندارىنا كوڭىل ايتۋ حاتىن جولدادى.
“ۇشاق داۋسىن ەستىگەن سايىن الەكساندردى ەسكە الامىز،” – دەلىنگەن حاتتا.
اقتاۋ قالاسىنىڭ ماڭىندا 11:10-دا ورىن العان قايعىلى وقيعادا "باكۋ-گروزنىي" باعىتىنداعى ۇشاق اپاتقا ۇشىراپ، بىرنەشە ادامنىڭ ءومىرى قيىلدى. اپاتقا ۇشىراعان ۇشاقتىڭ بۇعان دەيىن تۇركيادا كەلەڭسىز وقيعاعا تاپ بولعانى بەلگىلى بولدى.
ازەربايجاندا ورىن العان قايعىلى جاعدايعا بايلانىستى بۇگىن ازا تۇتۋ كۇنى دەپ جاريالاندى. قازاقستاندىقتار دا اپات قۇرباندارىن ەسكە الىپ، قايعىعا ورتاقتاسىپ جاتىر.
