ەكس-پرەزيدەنت نۇرسۇلتان نازارباەۆتىڭ نەمەرە ءىنىسى قايرات ساتىبالدى بوستاندىققا ەرتە شىعاتىن بولدى. بۇل تۋرالى بۇگىن، 16 تامىزدا شىعىس قازاقستان وبلىسىنىڭ سوتى مالىمدەدى، دەپ حابارلايدى “ادىرنا” ۇلتتىق پورتالى.
وسكەمەن قالاسىنىڭ №2 سوتى قايرات ساتىبالدىنىڭ وتەلمەگەن جازاسىنىڭ بولىگىن جەڭىل جازاعا اۋىستىرۋ تۋرالى ءوتىنىشىن قارادى.
«وسكەمەن قالاسىنىڭ №2 سوتى سوتتالعان قايرات ساتىبالدىنىڭ جازاسىنىڭ وتەلمەگەن بولىگىن جازانىڭ نەعۇرلىم جەڭىل تۇرىنە اۋىستىرۋ تۋرالى ءوتىنىشحاتىن قارادى. قايرات ساتىبالدى مۇلكى تاركىلەنىپ، مەملەكەتتىك قىزمەت اتقارۋ قۇقىعىنان 10 جىلعا دەيىنگى مەرزىمگە ايىرىلا وتىرىپ، 6 جىلعا باس بوستاندىعىنان ايىرىلعان بولاتىن. سوتتالعان ءوزىنىڭ ءوتىنىشحاتىندا جازاسىنىڭ وتەلمەگەن بولىگىن نەعۇرلىم جەڭىل تۇرىنە اۋىستىرۋ تۋرالى ءوتىنىشحاتىن بەرۋ ءۇشىن زاڭنىڭ بارلىق تالاپتارىن ورىنداعانىن اتاپ كورسەتكەن»، - دەپ جازدى سوت.
ءوز وتىنىشىندە ول كەلتىرىلگەن زالالدى وتەگەنىن، سونداي-اق مەملەكەتكە 700 ميلليارد تەڭگەدەن استام اقشا مەن مۇلىكتى ءوز ەركىمەن بەرگەنىن مالىمدەگەن.
سوت ونىڭ ءوتىنىشىن قاناعاتتاندىرىپ، باس بوستاندىعىنان ايىرۋ جازاسىنىڭ وتەلمەگەن بولىگىن 3 جىل 3 اي 7 كۇن مەرزىمگە اۋىستىردى. ول پروباتسيالىق باقىلاۋعا الىنادى.
باس بوستاندىعىنان ايىرۋ ورنىنداعى مەرزىم بوستاندىقتى شەكتەۋگە اۋىستىرىلدى.
قايرات ساتىبالدى سوت بارىسىندا قازاقستان حالقىنان كەشىرىم سۇرادى.
«مەن ءوز كىنامدى مويىندادىم، تولىق وكىنەمىن. بارلىق زاڭسىز اكتيۆتەردى قايتارۋ كەرەك بولدى - مۇنىڭ ءبارى قايتارىلدى. مەن پرەزيدەنتتىڭ اكتيۆتەردى قايتارۋ جونىندەگى ساياساتىن تولىقتاي قولدايمىن. مەنىڭ مىسالىم باسقالارعا بەلگىلى ءبىر قورىتىندى جاساۋعا جاقسى ۇلگى بولادى دەپ ويلايمىن. قاتە ارەكەت بولعان جەردە، مەن بىرەۋدى رەنجىتكەن بولسام، بارلىعىنان كەشىرىم سۇرايمىن»، - دەدى قايرات ساتىبالدى سوت بارىسىندا.
ەسكە سالايىق، 2022 جىلدىڭ 26 قىركۇيەگىندە سوت نازارباەۆتىڭ نەمەرە ءىنىسى قايرات ساتىبالدىنى ۇرلىق جانە ەكى كومپانياعا مۇلىكتىك زالال كەلتىرگەنى ءۇشىن التى جىلعا باس بوستاندىعىنان ايىرۋ تۋرالى ۇكىم شىعارعان بولاتىن. 2023 جىلى ەكس-پرەزيدەنتتىڭ تۋىسقانىنا قاتىستى باسقا دا قىلمىستاردى تەرگەۋ جالعاستى. قايرات ساتىبالدىعا قاتىستى قىلمىستىق جولمەن الىنعان كىرىستەردى جىلىستاتۋ ءىسى سوتقا 10 قاڭتاردا ءتۇستى. ال 1 ساۋىردە ساتىبالدى بۇل ءىس بويىنشا كىناسىن مويىندادى. ءساۋىردىڭ 11-ءى كۇنى استانادا ساتىبالداعا قاتىستى اقشانى جىلىستاتتى دەگەن ايىپ بويىنشا سوتتىڭ كەيىنگە شەگەرىلگەنى بەلگىلى بولدى.
2024 جىلدىڭ 12 تامىزىندا ساتىبالدى ءىسى بويىنشا 733 ميلليارد تەڭگەگە جۋىق اكتيۆتەر مەملەكەتكە قايتارىلعانى حابارلاندى. سودان كەيىن كورروزياعا قارسى اگەنتتىك قانداي اكتيۆتەردىڭ تالقىلانىپ جاتقانىن ءتۇسىندىردى.
