بيلىكتى اسىرا پايدالاندى دەپ ايىپتالعان بۇرىنعى ىشكى ىستەر ءمينيسترى ەرلان تۇرعىمباەۆتىڭ ىسىنە قاتىستى ۇكىم شىقتى. بۇل تۋرالى استانانىڭ قىلمىستىق ىستەر جونىندەگى اۋدانارالىق سوتى مالىمدەدى، دەپ حابارلايدى “ادىرنا” ۇلتتىق پورتالى.
استانا قالاسىنىڭ قىلمىستىق ىستەر جونىندەگى اۋدانارالىق سوتى اۋىر زارداپتارعا اكەپ سوققان بيلىكتى اسىرا پايدالاندى دەپ ايىپتالعان ت.-عا قاتىستى قىلمىستىق ءىستى قارادى (قر قك 362-بابىنىڭ 4-بولىگى).
اقپاراتقا سايكەس، بۇل ءىس "قۇپيا" دەگەن بەلگىمەن كىنانى مويىنداۋ نىسانىندا ءىس جۇرگىزۋ كەلىسىمىمەن كەلىپ ءتۇستى. سوندىقتان ونىڭ قارالۋى جابىق سوت وتىرىسىندا ءوتتى.
سوتتا پروكۋرور ايىپتى قولداپ، سوتتان 5 جىلعا باس بوستاندىعىنان ايىرۋ جازاسىن تاعايىنداۋدى سۇرادى.
بۇل رەتتە قك-ءنىڭ 63-بابى نەگىزىندە جازانى پروباتسيالىق باقىلاۋدى بەلگىلەي وتىرىپ، سول مەرزىمگە شارتتى تۇردە دەپ ايقىنداۋدى سۇرادى.
سوتتالۋشىنىڭ كىناسىن تولىق مويىنداپ، ءوز ىسىنە وكىنگەنى ايتىلادى.
سوت ۇكىمىمەن ەكس-مينيستر قىلمىس جاساعانى ءۇشىن كىنالى دەپ تانىلىپ، بەلگىلى ءبىر لاۋازىمداردى اتقارۋ قۇقىعىنان 10 جىلعا ايىرا وتىرىپ، 5 جىلعا باس بوستاندىعىنان ايىرىلدى.
سوت ەل پرەزيدەنتىنە ەكس-ءمينيستردى ارناۋلى اتاقتان جانە مەملەكەتتىك ناگرادالاردان ايىرۋ تۋرالى ۇسىنىس ەنگىزۋ تۋرالى شەشىم قابىلدادى.
ۇكىم زاڭدى كۇشىنە ەنگەن جوق.
بۇرىنعى ىشكى ىستەر ءمينيسترى ەرلان تۇرعىمباەۆ بيىل ساۋىردە ۇستالعان.
كەيىن ەكس-شەنەۋنىكتىڭ ەكى ايعا قاماۋعا الىنعانى حابارلاندى.
19 شىلدەدە بۇرىنعى ىشكى ىستەر ءمينيسترى ەرلان تۇرعىمباەۆتىڭ ءىسى سوتقا تۇسكەن ەدى.
1962 جىلى 14 تامىزدا تۋعان ەرلان تۇرعىمباەۆ زاڭ عىلىمدارىنىڭ كانديداتى، پوليتسيا گەنەرال-لەيتەنانتى. «بيلىك نەمەسە قىزمەت وكىلەتتىلىگىنىڭ شەگىنەن شىققانى ءۇشىن قىلمىستىق جاۋاپكەرشىلىك» تاقىرىبىندا كانديداتتىق ديسسەرتاتسيا قورعاعان. 2022 جىلعى قاڭتار وقيعاسىنان كەيىن مينيستر قىزمەتىنەن تۇسىرىلگەن ول پرەزيدەنت كەڭەسشىسى بولىپ تاعايىندالعان.
ماراپاتتارى:
- ءى جانە II دارەجەلى «داڭق» وردەنىنىڭ تولىق كاۆالەرى;
- II دارەجەلى «ايبىن» وردەنى;
- I دارەجەلى «قايسار» بەلگىسى;
- «ەۋرازيالىق ەكونوميكالىق وداقتىڭ دامۋىنا قوسقان ۇلەسى ءۇشىن» مەدالى;
- مەرەيتويلىق جانە ۆەدومستۆولىق مەدالدار;
- ىشكى ىستەر مينيسترلىگىنە ەڭبەك سىڭىرگەن قىزمەتكەرى.
