كانادا تۇرعىنى دجەففري ۆۋد بۇرىنعى ۇلىبريتانيا پرەمەر-ءمينيسترى ۋينستون چەرچيللدىڭ اتاقتى «ارىستانداي اقىرعان» (The Roaring Lion) دەپ اتالاتىن فوتوسۋرەتىن ۇرلاعانى ءۇشىن ەكى جىلعا جۋىق تۇرمە جازاسىنا كەسىلدى، دەپ حابارلايدى “ادىرنا” ۇلتتىق پورتالى ۆۆس-گە سىلتەپ.
ۆۋد 2021 جىلعى روجدەستۆو مەن 2022 جىلدىڭ باسى ارالىعىندا وتتاۆاداعى Fairmont Château Laurier قوناقۇيىنەن تۇپنۇسقا فوتوسۋرەتتى ۇرلاعانىن مويىندادى. سوت وعان ەكى جىلعا ءبىر كۇن جەتپەيتىن جازا تاعايىندادى – بۇل جازانىڭ فەدەرالدىق ەمەس، پروۆينتسيالىق تۇزەتۋ مەكەمەسىندە وتەلەتىنىن بىلدىرەدى.
چەرنو-بەلىي فوتوپورترەتتى كانادالىق ارميان تەكتى فوتوگراف يۋسۋف كارش 1941 جىلدىڭ جەلتوقسانىندا، چەرچيلل كانادانىڭ پارلامەنتىندە ءسوز سويلەگەننەن كەيىن، وتتاۆادا تۇسىرگەن.
وتكەن جىلى بۇل فوتوسۋرەت يتاليانىڭ گەنۋيا قالاسىنداعى جەكە كوللەكتسيادان تابىلدى — ساتىپ الۋشى ونىڭ ۇرلانعانىن بىلمەگەن. قوناقۇي قىزمەتكەرلەرى تۇپنۇسقا فوتوسۋرەتتىڭ جالعان كوشىرمەمەن اۋىستىرىلعانىن تەك 2022 جىلعى تامىزدا عانا اڭعارعان. يتاليالىق بيلىك فوتوسۋرەتتى كاناداعا قايتاردى.
كانادالىق باق-تىڭ جازۋىنشا، ۆۋد بۇل فوتوسۋرەتتى پسيحيكالىق دەنساۋلىعىنا بايلانىستى قيىندىق كورىپ جۇرگەن اعاسىنا كومەكتەسۋ ءۇشىن اقشا تابۋ ماقساتىندا ۇرلاعانىن ايتقان.
«كانادالىق فوتوگراف تۇسىرگەن پورترەتتىڭ وسىنداي داڭققا يە بولۋى — ۇلتتىق ماقتانىشتىڭ نىشانى.
قوعامىمىزدا مۇنداي تۋىندىلاردى كوپشىلىككە كورسەتۋ ءۇشىن سەنىم ەلەمەنتى بار. بۇل سەنىم — بارشا كانادالىقتار سول تۋىندىلاردى تاماشالاي الۋى ءۇشىن قاجەت. مۇنداي مۇلىكتى ۇرلاۋ، ءبۇلدىرۋ نەمەسە زاڭسىز اينالىمعا جىبەرۋ – وسى سەنىمدى بۇزۋ بولىپ سانالادى»، — دەدى ۇكىم شىعارۋ كەزىندە سۋديا روبەرت ۋوددەن.
ۆۋدتىڭ ادۆوكاتى بۇل ۇكىمنىڭ تىم قاتال ەكەنىن، ويتكەنى ونىڭ كليەنتى مۇنداي قىلمىستى العاش رەت جاساعانىن ايتتى.
