الماتىدا ۇلى وتان سوعىسىنىڭ ارداگەرى شاڭگەرەي جانىبەكوۆپەن قوشتاسۋ ءراسىمى ءوتتى. اقتىق ساپارعا شىعارىپ سالۋ ءراسىمۋ مايدانگەر تۇرعان ۇيدە ءوتتى، - دەپ حابارلايدى “ادىرنا” ۇلتتىق پورتالى.
ارداگەردى جەرلەۋ ءراسىمى كەڭساي زيراتىندا تولىق اسكەري قۇرمەتپەن ءوتتى.
شاراعا «قارۋلى كۇشتەردىڭ ارداگەرلەرى» رقب الماتى قالالىق فيليالىنىڭ توراعاسى، وتستاۆكاداعى پولكوۆنيك تولەگەن مۇستافين، الماتى گارنيزونىنىڭ، مەدەۋ اۋداندىق قورعانىس ءبولىمىنىڭ اسكەري قىزمەتشىلەرى، قازاقستان قارۋلى كۇشتەرىنىڭ ارداگەرلەرى قاتىستى.
شاڭگەرەي جانىبەكوۆ 1924 جىلى 15 ماۋسىمدا قوستاناي وبلىسى دەنيسوۆ اۋدانى قارپىق اۋىلىندا دۇنيەگە كەلگەن. جاستايىنان جەتىم قالعان ول تۋىستارىنىڭ قولىندا ءوستى.
قوستاناي مەديتسينالىق ۋچيليششەسىندە ءبىلىم الىپ، 1942 جىلى كەڭەس اسكەرى قاتارىنا اسكەري فەلدشەر بولىپ شاقىرىلدى. بريانسك، دالا جانە ەكىنشى ۋكراينا مايداندارىنداعى ۇرىستارعا قاتىسىپ، جارالانعان جاۋىنگەرلەرگە مەديتسينالىق كومەك كورسەتتى.
ارداگەر بەلگورود، حاركوۆ، پولتاۆا، كرەمەنچۋگ قالالارىن ازات ەتۋگە، سونداي-اق كورسۋن-شەۆچەنكو، ياسسى-كيشينەۆ وپەراتسيالارىنا قاتىسقان. رۋمىنيادا، ۆەنگريادا، چەحوسلوۆاكيادا، اۆستريادا فاشيستىك اسكەرلەرگە قارسى شايقاستارعا قاتىسقان.
شاڭگەرەي جانىبەكوۆ 2-دارەجەلى وتان سوعىسى، وكتيابر رەۆوليۋتسياسى، ەڭبەك قىزىل تۋ، حالىقتار دوستىعى، «قۇرمەت»، «پاراسات» وردەندەرىمەن، «ەرلىگى ءۇشىن»، «فاشيستىك كۇرەسكە قارسى كۇرەسكە بەلسەنە قاتىسقانى ءۇشىن» مەدالدارىمەن ماراپاتتالعان (چەحوسلوۆاكيا).
سوعىستان كەيىن دە جانىبەكوۆ پارتيا ورگاندارىندا جاۋاپتى قىزمەتتەر اتقارىپ، ەڭبەك جولىن جالعاستىردى. 1976 جىلى قازاق كسر مينيسترلەر كەڭەسى توراعاسىنىڭ ورىنباسارى بولىپ تاعايىندالىپ، زەينەتكەرلىككە شىققاننان كەيىن شەتەلدەگى قازاقتارمەن مادەني بايلانىس جونىندەگى رەسپۋبليكالىق قوعامدى، سوعىس جانە ەڭبەك ارداگەرلەرىنىڭ قازاق رەسپۋبليكالىق كەڭەسىن باسقاردى.
«شاڭگەرەي جانىبەكۇلىنىڭ ءومىر جولى – ەرلىكتىڭ، وتانعا دەگەن ادالدىق پەن تازالىقتىڭ ۇلگىسى، ونىڭ ءفاشيزمدى جەڭۋدەگى جانە قازاقستاننىڭ سوعىستان كەيىنگى دامۋىنا قوسقان ۇلەسى حالىق جادىندا وعان شەكسىز بەرىلگەندىكتىڭ جارقىن سيمۆولى رەتىندە ساقتالادى»، - دەپ اتاپ ءوتتى الماتى گارنيزونى.
