قاسىم-جومارت توقاەۆتىڭ قاراعاندى وبلىسىنا جۇمىس ساپارى تەمىرتاۋداعى «Qarmet» مەتاللۋرگيالىق زاۋىتىن ارالاۋدان باستالدى، دەپ حابارلايدى "ادىرنا" ۇلتتىق پورتالى اقوردانىڭ ءباسپاسوز قىزمەتىنە سىلتەپ.
ء"بىز وتاندىق ينۆەستوردى شاقىرۋ ارقىلى دۇرىس شەشىم قابىلدادىق. ولار بىردەن ىسكە كىرىستى. كومبيناتتاعى جاعداي بۇرىنعىمەن سالىستىرعاندا ايتارلىقتاي جاقسارعان. بىراق مۇنىمەن شەكتەلۋگە بولمايدى. ەڭ باستى مىندەت – Qarmet كاسىپورنىنىڭ باياعى داڭقىن قايتارىپ، الەۋمەتتىك ماسەلەلەردى شەشۋگە باسا ءمان بەرۋ. بۇل باعىتتاعى جۇمىس باستالىپ كەتتى. ودان حاباردارمىن. مەن كومبيناتقا جىل سايىن كەلىپ، ونىڭ دامۋ بارىسىمەن تانىسىپ تۇرامىن", – دەدى قاسىم-جومارت توقاەۆ.
«Qarmet» اكتسيونەرلىك قوعامى ديرەكتورلار كەڭەسىنىڭ توراعاسى اندرەي لاۆرەنتەۆ پەن كاسىپورىننىڭ باس ديرەكتورى ۆاديم باسين ءوندىرىستى دامىتۋ ءۇشىن اتقارىلعان جانە جۇزەگە اسىرىلىپ جاتقان جوبالار جونىندە باياندادى. بۇل ماقساتقا 3,5 ميلليارد دوللاردان استام قارجى قاراستىرىلعان. بۇدان بولەك 500 ميلليون دوللار شاماسىندا كومىر دەپارتامەنتىندەگى جانە 978 ميلليون دوللار كولەمىندە تەمىر رۋداسى دەپارتامەنتىندەگى جوبالارعا قوسىمشا ينۆەستيتسيا قۇيۋ جوسپارلانعان.
"قابىلدانعان ستراتەگياعا سايكەس كاسىپورىن 2028 جىلعا قاراي جىلىنا 5 ميلليون توننا بولات شىعارۋدى، 9 ميلليون توننا كومىر جانە 5 ميلليون توننا تەمىر رۋداسى كونتسەنتراتىن ءوندىرۋدى جوسپارلاپ وتىر. بۇل 2023 جىلعى كورسەتكىشتەرمەن سالىستىرعاندا ورتا ەسەپپەن 66 پايىز ءوسىمدى قامتاماسىز ەتەدى" دەلىنگەن حابارلامادا.
مەملەكەت باسشىسى كومبيناتتى تابيعي گازعا كوشىرۋ ماڭىزدى شەشىم ەكەنىن اتاپ ءوتتى. بۇل باستاپقى كەزەڭدە قورشاعان ورتاعا كەلەتىن زياندى 30 پايىزعا تومەندەتۋگە مۇمكىندىك بەرەدى. بيىل كۇزدە تەمىرتاۋ قالاسىندا ەكولوگيالىق تازا كولىك ءتۇرى – ترامۆاي جەلىسى قالپىنا كەلتىرىلەدى.
پرەزيدەنت ونەركاسىپ قاۋىپسىزدىگى، ءوندىرىستىڭ تيىمدىلىگىن ارتتىرۋ جانە جاڭعىرتۋ، ايماقتىڭ ەكولوگيالىق احۋالىن جاقسارتۋ باعىتىندا جۇزەگە اسىرىلىپ جاتقان جوبالاردىڭ مەرزىمى مەن جوعارى ساپا ستاندارتتارىن قاتاڭ ساقتاۋ قاجەت ەكەنىنە باسا نازار اۋدارىپ، بىرقاتار ناقتى تاپسىرما بەردى.
