قاراعاندىدا ءوز بالالارىن ءولتىردى دەپ ايىپتالعان 21 جاستاعى كەلىنشەككە سوت ۇكىمى شىقتى. اناسىنىڭ قولىنان قازا تاپقان قىزدارى 2 جانە 4 جاستا بولعان، - دەپ حابارلايدى "ادىرنا" ۇلتتىق پورتالى.
قىلمىس اعىمداعى جىلدىڭ ءساۋىر ايىندا بولعان. سوت انىقتاعانداي، ايىپتالۋشى ءۇش كىشكەنتاي قىزىمەن بىرگە قاراعاندى وبلىسى، بۇقار جىراۋ اۋدانىنداعى اۋىلداردىڭ بىرىندە جۇبىمەن بىرگە تۇرعان. ءبىر كۇنى ەر ادام ايەل مەن بالالاردى ۇيگە قاماپ، جۇمىسقا كەتىپ قالدى.
ايىپتاۋ قورىتىندىسى بويىنشا، جاس كەلىنشەك اقشانىڭ، تاماقتىڭ جوقتىعىنان جانە بالالارىنىڭ ۇنەمى جىلاۋىنان كۇيزەلىسكە تۇسكەن. ال ونى سىرتتان قاماپ كەتكەنى، جىعىلعان ۇستىنە جۇدىرىق بولىپ تيەدى. بالالاردىڭ كەزەكتى ايقايىنان كەيىن ول ۇلكەن قىزدارىن توسەككە جاتقىزىپ، كورپەمەن باسىپ، بۋىندىرىپ ءولتىردى.
سوتتالۋشى ءوز كىناسىن ءىشىنارا عانا مويىندادى. ول بالالاردى ءولتىرۋ نيەتى جوق ەكەنىن، تەك ولاردى ازداپ تىنىشتاندىرۋدى قالاعانىن ايتتى. سوتتالۋشىنىڭ ادۆوكاتى ونى قازاقستان رەسپۋبليكاسى قىلمىستىق كودەكسىنىڭ 99-بابىنىڭ 3-بولىگى «كامەلەتكە تولماعانداردى ءولتىرۋ» بويىنشا «ابايسىزدا ەكى ادامنىڭ ولىمىنە اكەپ سوعۋ» 104-بابىنىڭ 2-بولىگىنە قايتا دارەجەلەۋدى سۇرادى.
ءىس بويىنشا جينالعان بارلىق ماتەريالدار مەن دالەلدەمەلەردى زەردەلەي كەلە، قاراعاندى وبلىسىنىڭ سوتى سوتتالۋشىنى جاس بالالاردى ولتىرگەنى ءۇشىن كىنالى دەپ تانىپ، 20 جىلعا باس بوستاندىعىنان ايىرۋ جازاسىن قاتاڭ تارتىپتەگى قىلمىستىق-اتقارۋ جۇيەسىندە وتەۋگە تاعايىندادى.
«سوتتالۋشىعا تاعايىندالعان باپتىڭ سانكتسياسىندا جازا تاعايىنداۋ كەزىندە 20 جىلعا باس بوستاندىعىنان ايىرۋ نەمەسە ءومىر بويىنا باس بوستاندىعىنان ايىرۋ جازاسى قاراستىرىلعان. قىلمىستىق كودەكستىڭ 46-بابىنا سايكەس ءومىر بويىنا باس بوستاندىعىنان ايىرۋ ۇكىمى زاڭدى كۇشىنە ەنگەن جوق»، - دەپ حابارلادى قاراعاندى وبلىسى تجد ءباسپاسوز قىزمەتى.
ايتا كەتەيىك، سوتتالۋشىنىڭ ءۇش قىزى بولعان، كىشىسى قىلمىس جاساعان كەزدە التى ايلىق بولعان. اناسى ۇستالعان سوڭ ءسابي بالالار ۇيىنە جىبەرىلدى.
ەسكە سالا كەتەيىك، بۇعان دەيىن قاراعاندى وبلىسىنىڭ تۇرعىنى كىشكەنتاي بالالارىن تاماق سۇراي بەرگەن سوڭ تۇنشىقتىرىپ ولتىرگەنى حابارلانعان بولاتىن. بالالاردى تۇنشىقتىرىپ ولتىرگەن ايەل ءوزىنىڭ سەرىكتەسىن كەشكە دەيىن كۇتكەنى حابارلاندى. پوليتسيا شاقىرعان سول سەرىكتەسى بولاتىن.
