ۋاقىت بەلدەۋىن بۇرىنعى رەجيمگە قايتارۋ تۋرالى پەتيتسيانى تالقىلاۋدا ەكى تاراپ ورتاق شەشىمگە كەلە المادى. بۇل تۋرالى بۇگىن ساۋدا جانە ينتەگراتسيا ۆيتسە-ءمينيسترى قايرات بالىقباەۆ جاۋاپتى مەملەكەتتىك ورگاننىڭ الدىن الا شەشىمىن جاريالادى، دەپ حابارلايدى “ادىرنا” ۇلتتىق پورتالى قازاقپاراتقا سىلتەمە جاساپ.
2 ساعاتتان استام ۋاقىتقا سوزىلعان جيىندا ەكى تاراپ ورتاق شەشىمگە كەلە المادى.
وتىرىستىڭ توراعاسى رەتىندە ءسوز العان قايرات بالىقباەۆ پەتيتسيا تالابىنا بايلانىستى شەشىم جوباسىن جاريالادى. دەگەنمەن ول بۇل ايتىلعان شەشىم تەك جوسپار عانا ەكەنىن، ناقتى شەشىم ەمەستىگىن ەسكەرتتى.
«مەن الدىن الا شەشىمدى ايتايىن دەپ وتىرمىن. ۋاقىت بەلدەۋىن بۇرىنعى قالپىنا قايتارۋ تۋرالى پەتيتسيا وكىلدەرىنىڭ ۋاجدەرىن تالقىلاي كەلىپ، ول تالاپتى ورىنداۋدان باس تارتۋ جونىندە شەشىم قابىلداۋعا بەكىنىپ وتىرمىز. مەن بۇگىنگى جيىننىڭ توراعاسى رەتىندە وسى 1,5 اي ىشىندە سىزدەر اتقارعان بۇكىل جۇمىستىڭ قورىتىندىسى بويىنشا ءوتىنىم بەرۋشىلەر كەلتىرگەن ۋاجدەردىڭ ەشبىرىن دالەلدەيتىن فاكتىلەر تابىلعان جوق. ۋاقىت بەلدەۋىنىڭ وزگەرۋى ازاماتتاردىڭ دەنساۋلىعىنا دا، ەلەكتر قۋاتىن تۇتىنۋ شىعىندارىنا دا اسەر ەتكەن جوق»، — دەدى ۆيتسە-مينيستر.
ايتا كەتەيىك، بۇعان دەيىن ۋتيلاليزاتسيالىق الىمدى الىپ تاستاۋ بويىنشا 50 مىڭ قول جيناعان پەتيتسياعا قاتىستى قوعامدىق تىڭداۋ ءوتىپ، بيلىك پەتيتسيا تالابىن ورىنداۋدان باس تارتقان ەدى.
ەسكە سالساق، 2020 جىلعى 1 قىركۇيەكتەگى مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا: «ازاماتتارىمىز رەفورمالارعا باستاماشى بولىپ، ۇسىنىستار بەرۋ ءۇشىن ونلاين-پەتيتسيالاردىڭ بىرىڭعاي زاڭدى ينستيتۋتىن قۇرۋ قاجەت. مۇنداي قۇرىلىم قانداي دا ءبىر بۇرمالاۋ ارەكەتتەرىنەن تولىق قورعالۋعا ءتيىس»، دەلىنگەن بولاتىن.
