قىرعىزستاندا ءۇش الماتىلىق جانە ءبىر ماسكەۋلىك الپينيست قار كوشكىنىنىڭ استىندا قالدى، بىرەۋى قازا تاپتى، دەپ حابارلايدى “ادىرنا” ۇلتتىق پورتالى.
«29 شىلدە. حان ءتاڭىرى ەكسپەديتسياسى 2024. 5050 م بيىكتىكتە، 8.15-تە، حان ءتاڭىرىنىڭ وڭتۇستىك جاعىنداعى «بوتەلكەگە» كىرە بەرىستە، ءتورت ادامنان تۇراتىن توپ قار كوشكىنى استىندا قالدى: بوريس دەدەشكو (الماتى), پاۆەل بلاجنوۆ، مارياننا پەتروۆا (الماتى), الەكسەي سميرنوۆ (ماسكەۋ). ءبىزدى ءوزىمىز قازعان شۇڭقىر قۇتقاردى. (...) ءبىز ارشىپ الۋعا تىرىستىق، بىراق ناتيجە بولمادى. ىلعالدى قار مۇزعا اينالىپ، ساۋساقتارىمىز قوزعالا الماي، توڭىپ قالدى. قار كوشكىنى ءبىزدى تاسشا قاتىردى»، - دەپ ءبولىستى الپينيستەردىڭ ءبىرى پاۆەل بلاجنوۆ الەۋمەتتىك جەلىدەگى پاراقشاسىندا.
الپينيست قار كوشكىنى استىندا 40 مينۋتتان استام ۋاقىت بولعانىن حابارلادى.
«ءبىز بازامەن راديو ارقىلى د.گرەكوۆپەن بايلانىسقا شىقتىق، ءتورت جولسەرىكتەن تۇراتىن توپ بىزدەن 20 مينۋت جوعارىدا ءجۇردى، توپتى ۆيتالي اكيموۆ باسقاردى. ءبىز ولارعا قاي جەردە ەكەنىمىزدى سيپاتتادىق. جىگىتتەر ءبىزدى ىزدەي باستادى، ىزدەۋ شارالارى ۇزاققا سوزىلدى. بارلىعى 3 مەترلىك كوشكىننىڭ استىندا 40 مينۋتتان استام ۋاقىت وتكىزدىك. الەكسەي سول جەردە قازا تاپتى، ول شۇڭقىرعا جاسىرىنىپ ۇلگەرمەدى، ول 1,5 مەترگە جەتپەدى، ءسىرا، ريۋكزاگىن تاستاعىسى كەلمەدى»، - دەپ قوستى بلاجنوۆ.
سونداي-اق ول قايتىس بولعان ءالپينيستىڭ دەنەسىن ارشۋ جۇمىستارى 2 تامىزدا باستالاتىنىن قوستى.
«ولار ءبىزدى ارشىپ العان سوڭ، تاعى دا قار كوشكىنى ءجۇرىپ، زاتتارىمىز جان-جاققا شاشىرادى. ەشقانداي زاردابى تيمەدى. ءبىز الەكسەيدى تاستاپ، 4 مىڭ مەترلىك بازاعا قاراي ۇزاق تومەن ءتۇسۋدى باستادىق. 2 تامىزدا الەكسەيدى ارشىپ الۋ جانە ءتۇسىرۋ جۇمىستارى باستالادى»، - دەپ تۇيىندەدى الپينيست.
