جاز ماۋسىمى دەمالىسىمەن قىزىق. ەلىمىزدە ءارى دەمالىپ، ءارى سۇلۋلىعىنا تامسانىپ، دەمالاتىن كورىكتى جەرلەر جەتەرلىك. سونىڭ ىشىندە شيپالى سۋىمەن تالايدىڭ سۇيىكتى دەمالىس مەكەنىنە اينالعان الاكولدىڭ ءجونى بولەك. جۋىردا كول جاعاسىنداعى اقشي اۋىلىندا وتكەن «Alakol Fest – 2024» مۋزىكالىق فەستيۆالى اسپاندى اۋەلەتكەن اۋەنىمەن دەمالۋشىلاردىڭ كوڭىلىن كوككە كوتەرىپ، وتاندىق ءتۋريزمنىڭ مارتەبەسىن ارتتىردى.
الاكول – قازاقستانداعى سيرەك كولدەردىڭ ءبىرى، جاعالاۋى مالتا تاسپەن كومكەرىلگەن، سۋىنىڭ قۇرامى ەمدىك مينەرالدارعا تولى ەرەكشە سۋ ايدىنى. ەلىمىزدە تۋريزم قارىشتاپ دامىعالى بەرى مۇندا كەلەتىن قوناقتار سانى ەسەلەپ ارتا تۇسۋدە. الاكولدىڭ داڭقى تەك قازاقستاندا عانا ەمەس، جاقىن شەتەلدەردە دە تانىمال، جىل سايىن ارنايى كەلىپ دەمالاتىن حالىقتىڭ قاراسى وتە مول. قازىرگى ۋاقىتتا كول بويىندا دەمالۋعا قولايلى سانالۋان دەمالىس بازالارى جانە پانسيوناتتار كەلۋشىلەرگە قىزمەت كورسەتەدى. بيىلعى ماۋسىم الاكولگە قىزىعۋشىلار سانى ءتىپتى ارتقانىن كورسەتتى، جاعاجايدا ينە شانشارلىق بوس ورىن جوق.
اشىق اسپان استىندا وتكەن «Alakol Fest – 2024» مۋزىكالىق فەستيۆالىن جان-جاقتان جينالعان بەس مىڭنان استام ادام تاماشالادى، ولار ءتىپتى اۋا-رايىنىڭ قولايسىزدىعىنا قاراماستان كول اينالاسىن كوتەرىڭكى كوڭىل-كۇيگە بولەدى.
ايدىندى الاكول جاعاسىنداعى فەستيۆال ساحناسىندا تانىمال ەسترادا ارتيستەرى ءادىل جالماعامبەتوۆ (Adil), ەڭلىك قۇراربەك (Yenlik), لۋيزا كارينباەۆا (Luina), ايگەرىم راقىشەۆا (Ayree) تىڭدارماننىڭ ەڭ سۇيىكتى اندەرىن ورىندادى. كەشتىڭ مۋزىكالىق تىزگىنىن ۇستاعان جۇرگىزۋشىلەر ەركەبۇلان مىرزابەك پەن مارات ورالعازين جاراسىمدى ءازىل-قالجىڭىمەن دەمالۋشىلاردىڭ كوڭىلىنەن شىقتى.
فەستيۆال وتاندىق ءتۋريزمنىڭ كوكەيكەستى ماسەلەلەرى شەشىمىن تابا باستاعانىن كورسەتتى، كول اۋماعىنا جەتۋ جەڭىلدەگەن، اپتاسىنا 28 رەت استانا، الماتى جانە تالدىقورعان قالالارىنان 3 اۋە رەيسى، الماتى، استانا قالالارىنان، شىعىس قازاقستان وبلىسىنان جانە اباي وبلىسىنان 12 تەمىرجول رەيسى، الماتى مەن تالدىقورعاننان 50 ورىندىق اۆتوبۋستار كۇندە جۇرەدى. سوندىقتان بولار، جىلداعىعا قاراعاندا تۋريستەر قاراسى كۇرت كوبەيگەن، دەرەكتەر بويىنشا، مۇندا جىلىنا 1,5 ملن ادام دەمالادى.
سۋى شيپا، كوركى اسەم الاكول، ەلىمىزدىڭ ماقتانىشىنا اينالعان ايگىلى نىساندا وتكەن مۋزىكالىق فەستيۆال ىشكى تۋريزمگە نازار اۋدارىپ، ودان سايىن جاقسارا تۇسۋىنە سەپتىگىن تيگىزەرى ءسوزسىز.
د.يسكاكوۆ
