وزبەكستان ءبىرىنشى وتاندىق «ارسلون» اتاۋىمەن برونەترانسپورتەر (بتر) جاساپ شىعاردى، دەپ حابارلايدى “ادىرنا” ۇلتتىق پورتالى «وزبەكستان 24» تەلەارناسى مەن قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
بتر-دى Krantas Group جەكە كومپانياسى قۇراستىرعان. جابدىق ناتو ستاندارتتارىنا سايكەس جاسالعان.
بتر قاۋىپتى ايماقتاردا ارنايى تاپسىرمالاردى ورىندايتىن 11 ادامعا دەيىن ء(ۇش ەكيپاج مۇشەسى جانە سەگىز دەسانتشى) جەكە قۇرامدى تاسىمالداۋعا ارنالعان اسكەري كولىك. ونىڭ سالماعى 32 توننادان 35 تونناعا دەيىن بولادى. الدىڭعى بولىگى قورعانىستىڭ ماكسيمۋم، التىنشى كلاسى بويىنشا، بۇيىرلىك جانە ارتقى بولىكتەر - ءتورتىنشى كلاسى بويىنشا جاسالعان. بتر 30 مم زەڭبىرەكپەن جانە 7,62 مم پۋلەمەتپەن جابدىقتالعان، مينادان قورعانۋ تروتيل ەكۆيۆالەنتىندە 10 كگ-دى قۇرايدى.
«ارسلون» زاماناۋي ۇرىس مودۋلىنە يە، كۇندىز دە، تۇندە دە كەز كەلگەن كليماتتىق جاعدايلاردا جاۋىنگەرلىك تاپسىرمالاردى ورىنداي الادى، الىس جانە جاقىن قاشىقتىقتاعى نىساناعا ءدال تيگىزۋدە اتىس قولداۋىن قامتاماسىز ەتەدى.
جاقىن ارادا وزبەكستان قارۋلى كۇشتەرىنە «ارسلون» برونەترانسپورتەرى جەتكىزىلەدى. ارميا سونىمەن قاتار جەكە قۇرامدى تاسىمالداۋعا جانە قاۋىپتى ايماقتاردا ارنايى تاپسىرمالاردى ورىنداۋعا ارنالعان جەڭىل بروندى تارلون-م كولىگىنىڭ ءتورتىنشى نۇسقاسىن الادى.
«تارلون-م» ءموبيلدى توپتاردى، باقىلاۋ-وتكىزۋ پۋنكتتەرى مەن جاۋىنگەرلىك پاترۋلدەردى اتىسپەن قامتاماسىز ەتۋ، اسكەرلەر مەن اۆتوكولىك كولوننالارىن جاۋىنگەرلىك قورعاۋ، ەكيپاج بەن اسكەرلەردى اتىس قارۋىنان قورعاۋ ءۇشىن قولدانىلادى.
