Özbekstan bırınşı otandyq «Arslon» atauymen bronetransporter (BTR) jasap şyǧardy, dep habarlaidy “Adyrna” ūlttyq portaly «Özbekstan 24» telearnasy men Qorǧanys ministrlıgınıŋ baspasöz qyzmetıne sılteme jasap.
BTR-dy Krantas Group jeke kompaniiasy qūrastyrǧan. Jabdyq NATO standarttaryna säikes jasalǧan.
BTR qauıptı aimaqtarda arnaiy tapsyrmalardy oryndaityn 11 adamǧa deiın (üş ekipaj müşesı jäne segız desantşy) jeke qūramdy tasymaldauǧa arnalǧan äskeri kölık. Onyŋ salmaǧy 32 tonnadan 35 tonnaǧa deiın bolady. Aldyŋǧy bölıgı qorǧanystyŋ maksimum, altynşy klasy boiynşa, büiırlık jäne artqy bölıkter - törtınşı klasy boiynşa jasalǧan. BTR 30 mm zeŋbırekpen jäne 7,62 mm pulemetpen jabdyqtalǧan, minadan qorǧanu trotil ekvivalentınde 10 kg-dy qūraidy.
«Arslon» zamanaui ūrys modulıne ie, kündız de, tünde de kez kelgen klimattyq jaǧdailarda jauyngerlık tapsyrmalardy oryndai alady, alys jäne jaqyn qaşyqtyqtaǧy nysanaǧa däl tigızude atys qoldauyn qamtamasyz etedı.
Jaqyn arada Özbekstan qaruly küşterıne «Arslon» bronetransporterı jetkızıledı. Armiia sonymen qatar jeke qūramdy tasymaldauǧa jäne qauıptı aimaqtarda arnaiy tapsyrmalardy oryndauǧa arnalǧan jeŋıl brondy Tarlon-M kölıgınıŋ törtınşı nūsqasyn alady.
«Tarlon-M» mobildı toptardy, baqylau-ötkızu punktterı men jauyngerlık patrulderdı atyspen qamtamasyz etu, äskerler men avtokölık kolonnalaryn jauyngerlık qorǧau, ekipaj ben äskerlerdı atys qaruynan qorǧau üşın qoldanylady.
Ūqsas jaŋalyqtar
