سولتۇستىك قازاقستان وبلىسى، عابيت مۇسىرەپوۆ اتىنداعى اۋداننىڭ ءبىلىم بولىمىنە قاراستى نوۆويشيم قازاق ورتا مەكتەبىن قارۋلى كۇزەت 24 ساعات "ورازا ۇستاپ" كۇزەتپەك، دەپ حابارلايدى ادىرنا ۇلتتىق پورتالى satypalu.gov.kz سايتىنا سىلتەمە جاساپ.
18 شىلدە كۇنى اتالعان مەكەمە "نوۆويشيم قازاق وم كمم وبەكتىنى قارۋلى فيزيكالىق كۇزەت قىزمەتى" دەگەن تاقىرىپپەن تەندەر جاريالاعان. تەندەر جەڭىمپازى 25 شىلدە كۇنى انىقتالادى. كۇزەت قىزمەتىنىڭ قۇنى 4 821 428 تەڭگەگە باعالانعان.
جالپى، تەحنيكالىق سيپاتتاماداعى شىم-شىتىرىق اقپاراتتارعا قاراپ، ورتا مەكتەپ كۇزەت قىزمەتىن جالداۋعا مەملەكەتتىك تاپسىرىس بەرىپ وتىرعانىن اڭعاردىق. دەسە دە، مەملەكەتتىك تىلدەگى سيپاتتامانىڭ ساپاسى سىن كوتەرمەيدى. قاراڭىز: "جۇمىس رەجيمى: 1 پوست. مەكتەپ-تاۋلىك بويى ورازا ۇستاۋ (24 ساعات), كۇن سايىن ساعات 08-00-دە اۋىسۋ جانە دەمالىس جانە مەرەكە كۇندەرىن (8 ساعات) ەسكەرە وتىرىپ، كۇن سايىن ساعات 09:00-دەن 17:00-گە دەيىن كۇندىزگى اۋىسىم. 2 پوست. ينتەرنات - كۇندىزگى ورازا (12 ساعات), 08-00-دەن 2-00-گە دەيىن" دەپ باستالعان ەكى-ءۇش بەتتىك ماتىننەن تۇكتى دە ۇقپادىق.
سولتۇستىك قازاقستان وبلىسىنداعى قازاق مەكتەبىندەگى مەملەكەتتىك ءتىلدىڭ جاعدايى وسىنداي بولسا، باسقالاردان نە قايىر؟ وبلىستىق ءبىلىم باسقارماسى سوندا بۇل قاتەلىكتەردى كورمەي مە؟ "قارۋلى فيزيكالىق كۇزەت قىزمەتىن" پايدالاناتىنداي جاڭا قازاقستانىمىز اۋعانستان با ەدى؟ قازىنا قارجىسىنا تەندەر وتكىزىپ، مەملەكەتتىك ءتىلدى ماسقارالايتىندارعا لايىق جازا جوق پا، سوندا؟
بۇل سۇراقتاردى وبلىستىق ءبىلىم باسقارماسىنا جولدايمىز. ولاردان جەتكەن جاۋاپتى دا الداعى ۋاقىتتا جاريالايتىن بولامىز!
اباي اسىل
ادىرنا ۇلتتىق پورتالى
