ادىلەت مينيسترلىگىندە جاڭادان ءۇش كوميتەت قۇرىلدى. بۇل تۋرالى مينيسترلىكتىڭ رەسمي سايتى جاريالادى، دەپ حابارلايدى “ادىرنا” ۇلتتىق پورتالى.
زياتكەرلىك مەنشىك قۇقىعى، ماجبۇرلەپ ورىنداتۋ، تىركەۋ قىزمەتى جانە زاڭ قىزمەتتەرىن ۇيىمداستىرۋ كوميتەتتەرى وسى سالالاردا رەتتەۋ مەن قىزمەت كورسەتۋدى جاقسارتادى.
ماسەلەن، زياتكەرلىك مەنشىك قۇقىعى كوميتەتى شىعارماشىلىق پەن يننوۆاتسيانى دامىتا وتىرىپ، زياتكەرلىك مەنشىك قۇقىقتارىن قورعاۋ جانە ساقتاۋ ماسەلەلەرىمەن اينالىسادى. بۇل پاتەنتتەر مەن اۆتورلىق قۇقىقتاردى ءتيىمدى باسقارۋعا، سونداي-اق عىلىمنىڭ، تەحنولوگيانىڭ جانە مادەنيەتتىڭ دامۋىنا جول اشادى.
ماجبۇرلەپ ورىنداتۋ كوميتەتى سوت ورىنداۋشىلارىنىڭ ءىس-ارەكەتتەرىنىڭ زاڭدىلىعىن ساقتاۋعا، ازاماتتاردىڭ بۇزىلعان قۇقىقتارىن جەدەل قالپىنا كەلتىرۋگە، سونداي-اق اتقارۋشىلىق ءىس جۇرگىزۋدى جاڭعىرتۋعا باسىمدىق بەرەدى.
ال تىركەۋ قىزمەتى جانە زاڭ قىزمەتتەرىن ۇيىمداستىرۋ كوميتەتى زاڭدى تۇلعالاردى تىركەۋ، جىلجىمايتىن مۇلىككە قۇقىقتار مەن ازاماتتىق حال اكتىلەرىن، نوتارياتتىق جانە ادۆوكاتتىق قىزمەتتى رەتتەۋ سالاسىن جانە زاڭ كومەگىن كورسەتۋ ساپاسىن قاداعالايدى.
