اتىراۋلىق تۇرعىن جاس تۇلەكتى ءولتىردى دەگەن كۇدىككە ءىلىندى، دەپ حابارلايدى "ادىرنا" ۇلتتىق پورتالى.
Orda.kz مالىمەتىنشە، قايعىلى وقيعا 4 شىلدە كۇنى بولعان.
جاس تۇلەك ماحامبەت اۋدانى سارىتوعاي اۋىلىنىڭ تۇرعىنى. باق مالىمەتىنشە، 19 جاستاعى ازامات 17 جاستاعى تۇلەكتى ءشوپ شابۋعا كومەكتەسپەگەنى ءۇشىن ولتىرگەن. پوليتسيا قىلمىستىق ءىستى "ابايسىزدا ءولتىرىپ الۋ" بويىنشا تىركەگەن.
بىراق 11 شىلدەدە اتىراۋ وبلىسى پروكۋراتۋراسىنىڭ نۇسقاۋى بويىنشا كۇدىكتىنىڭ ارەكەتتەرى "ابايسىزدا ولىمگە اكەپ سوقتىرعان دەنساۋلىققا قاساقانا اۋىر زيان كەلتىرۋ" بابى بويىنشا قايتا قارالىپ، ول قاماۋعا الىندى.
"13 شىلدەدە سوت كۇدىكتىگە قاتىستى ەكى اي مەرزىمگە قاماۋدا ۇستاۋ تۇرىندەگى بۇلتارتپاۋ شاراسىن سانكتسيالادى. ءىستى تەرگەۋ بارىسى ەرەكشە باقىلاۋدا", - دەپ حابارلادى اتىراۋ وبلىسىنىڭ پروكۋراتۋراسى.
