مەملەكەت باسشىسى قاسىم-جومارت توقاەۆ 2024 جىلعى وليمپياداعا قاتىسۋشىلارعا قازاقستان تۋىن تابىس ەتتى، دەپ حابارلايدى "ادىرنا" ۇلتتىق پورتالى اقوردانىڭ ءباسپاسوز قىزمەتىنە سىلتەپ.
«پرەزيدەنت ءحححىىى جازعى وليمپيادا ويىندارىنا قاتىساتىن قازاقستان قۇراما كومانداسىنىڭ مۇشەلەرىنە مەملەكەتتىك تۋدى تاپسىردى. قاسىم-جومارت توقاەۆ ۇلتتىق قۇراما سپورتشىلارىمەن كەزدەسۋدە پاريجدە باستالاتىن ءدۇبىرلى دودانى بۇكىل الەم اسىعا كۇتەتىنىن ءارى وعان تورتكۇل دۇنيە تۇگەل كوز تىگىپ وتىرعانىن ايتتى. سونىمەن قاتار ۇزدىكتەردىڭ ۇزدىگى باق سىنايتىن بايراقتى باسەكەگە ەڭ مىقتى سپورتشىلارىمىز بارا جاتقانىن اتاپ ءوتىپ، ەل نامىسىن قورعاۋ ابىرويلى مىندەت ەكەنىنە توقتالدى»، - دەلىنگەن سارسەنبىدە تاراعان حابارلامادا.
مەملەكەت باسشىسى اتاپ كورسەتكەندەي، ەل نامىسىن قورعاۋ – جاۋاپتى دا ابىرويلى پارىز.
ء"بىز سىزدەرگە زور ءۇمىت ارتامىز. بۇكىل حالقىمىز – سىزدەرگە جانكۇيەر. جالپى، قازاق سپورت مەكتەبىنىڭ مارتەبەسى قاشاندا بيىك. سپورتشىلارىمىز ءاردايىم ەلگە جۇلدەمەن ورالىپ ءجۇر. وسى داڭقتى جولدى ابىرويمەن جالعايسىزدار دەپ سەنەمىن. شىن مانىندە، سىزدەردىڭ جەڭىستەرىڭىز تۇتاس قازاقستاننىڭ جەڭىسى بولماق. كوك تۋىمىز جەلبىرەسە، ۇلتىمىزدىڭ رۋحى اسقاقتايدى", – دەدى مەملەكەت باسشىسى.
قاسىم-جومارت توقاەۆ اتاپ وتكەندەي، سپورتشىلارىمىزعا بارلىق جاعداي جاسالىپ جاتىر.
"ەلدى مەكەندەردە ارنايى الاڭدار سالىنىپ جاتىر. وتكەن جىلدىڭ وزىندە 70-كە جۋىق سپورت ورتالىعى اشىلدى. بيىل تاعى 200-گە جۋىق نىسان سالىنادى. بارشاڭىزعا ءمالىم، ۇلتتىق وليمپيادا كوميتەتىندە وزگەرىستەر بولدى. وليمپيادا ويىندارىنا دايىندىق شتابى قۇرىلدى. تاجىريبەلى مامانداردى شاقىردىق. بەلگىلى سپورتشى گەننادي گولوۆكين كەلدى. ءار سالادا وسىنداي ءوز ءىسىنىڭ ناعىز شەبەرى بولۋعا ءتيىس. سوندا عانا ناتيجە بولادى. ءبىز – سپورتشىلارعا ايرىقشا قۇرمەت كورسەتەتىن ەلمىز", – دەدى مەملەكەت باسشىسى.
مەملەكەت باسشىسى سپورت تاريحىندا وشپەس ءىز قالدىرعان جەرلەستەرىمىزدىڭ ەڭبەگى جوعارى باعالانىپ جاتقانىنا نازار اۋداردى.
"بالۋان شولاق، قاجىمۇقان مۇڭايتپاسوۆ، جاقسىلىق ۇشكەمپىروۆ، الەكساندر ۆينوكۋروۆ، بەكزات ساتتارحانوۆ، ولگا رىپاكوۆا اتىنداعى سپورت نىساندارى – سونىڭ ايقىن كورىنىسى. سىزدەر دە بيىك بەلەستى باعىندىرا الاسىزدار. مەن بۇعان كامىل سەنەمىن. بۇگىنگى جاستارىمىز سىزدەرگە قاراپ بوي تۇزەيدى. بۇل – ۇلكەن ابىروي", – دەدى قاسىم-جومارت توقاەۆ.
باياندامادا اتاپ وتىلگەندەي، ءبىزدىڭ ەلىمىز ارقاشان بەيبىتشىلىك پەن ىنتىماقتاستىق ساياساتىن ۇستانادى.
"وتكەن اپتادا استانادا شىۇ ءسامميتى تابىستى ۇيىمداستىرىلدى. بۇل ماڭىزى زور شارانىڭ باستى ماقساتى مەملەكەتتەر مەن حالىقتار اراسىنداعى ديالوگتى، دوستىق پەن سەنىمدى نىعايتۋ بولدى. مۇنداي باسىمدىقتار كۇللى سپورت الەمىنە دە ءتان. ويتكەنى كەز كەلگەن سپورت سايىسى، ەڭ الدىمەن، ىنتىماقتاستىقتى، العا ۇمتىلىستى جانە ادامداردىڭ بىرلىگىن كورسەتەدى. وليمپيادا ويىندارىنىڭ قۇندىلىقتارى قاراپايىم سپورت جەتىستىكتەرىنەن اسىپ تۇسەدى. ول – جەكەلەگەن سپورتشىلاردىڭ دا، تۇتاس مەملەكەتتەردىڭ دە تەڭدىگىنىڭ، ءوزارا قۇرمەتى مەن ادال باسەكەلەستىگىنىڭ جارقىن بەينەسى", – دەدى پرەزيدەنت.
پرەزيدەنت سپورتشىلارعا ەلىمىزدى لايىقتى تانىتۋداعى جاۋاپتى ميسسيا تۇرعانىنا توقتالىپ، ولارعا ساتتىلىك تىلەدى.
ء"بارىڭىز وليمپيادا جولداماسىن يەلەنۋ ءۇشىن كوپ كۇش جۇمسادىڭىزدار. وزدەرىڭىزدىڭ اسقان شەبەرلىكتەرىڭىزدى كورسەتىپ، جاقسى ناتيجەلەرگە قول جەتكىزەتىندەرىڭىزگە سەنىمدىمىن. سىزدەرگە بارشا قازاقستان حالقى قولداۋ كورسەتەدى. ارينە، چەمپيون بولۋ وڭاي ەمەس. قازاقتا «نامىسقا شاپساڭ – الىسقا شاباسىڭ» دەگەن ءسوز بار. سوندىقتان جەڭىمپاز بولاسىزدار دەپ سەنەمىن", – دەدى مەملەكەت باسشىسى.
توقاەۆ ۇلتتىق قۇراما كاپيتانى اسلانبەك شىمبەرگەنوۆكە قازاقستان رەسپۋبليكاسىنىڭ مەملەكەتتىك تۋىن تابىس ەتتى.
قازاقستان قۇراما كومانداسىنىڭ نەگىزگى بولىگى كەزدەسۋگە الماتى وبلىسىنداعى «اقبۇلاق» وليمپيادالىق ورتالىعىنان بەينەبايلانىس ارقىلى قاتىستى. وندا سپورتشىلار پاريج وليمپياداسى الدىنداعى سوڭعى جاتتىعۋ جيىندارىن وتكىزىپ جاتىر.
«سونداي-اق ءىس-شارادا بوكستان الەم چەمپيونى اسلانبەك شىمبەرگەنوۆ، جەڭىل اتلەتيكادان ازيا ويىندارىنىڭ جەڭىمپازى ولگا سافرونوۆا، دزيۋدودان وليمپيادا ويىندارىنىڭ جۇلدەگەرى ەلدوس سمەتوۆ ءسوز سويلەدى»، - دەپ تولىقتىردى اقوردا.
