Memleket basşysy Qasym-Jomart Toqaev 2024 jylǧy Olimpiadaǧa qatysuşylarǧa Qazaqstan tuyn tabys ettı, dep habarlaidy "Adyrna" ūlttyq portaly Aqordanyŋ baspasöz qyzmetıne sıltep.
«Prezident HHHIII jazǧy Olimpiada oiyndaryna qatysatyn Qazaqstan qūrama komandasynyŋ müşelerıne Memlekettık tudy tapsyrdy. Qasym-Jomart Toqaev Ūlttyq qūrama sportşylarymen kezdesude Parijde bastalatyn dübırlı dodany bükıl älem asyǧa kütetının ärı oǧan törtkül dünie tügel köz tıgıp otyrǧanyn aitty. Sonymen qatar üzdıkterdıŋ üzdıgı baq synaityn bairaqty bäsekege eŋ myqty sportşylarymyz bara jatqanyn atap ötıp, el namysyn qorǧau abyroily mındet ekenıne toqtaldy», - delıngen särsenbıde taraǧan habarlamada.
Memleket basşysy atap körsetkendei, el namysyn qorǧau – jauapty da abyroily paryz.
"Bız sızderge zor ümıt artamyz. Bükıl halqymyz – sızderge janküier. Jalpy, qazaq sport mektebınıŋ märtebesı qaşanda biık. Sportşylarymyz ärdaiym elge jüldemen oralyp jür. Osy daŋqty joldy abyroimen jalǧaisyzdar dep senemın. Şyn mänınde, sızderdıŋ jeŋısterıŋız tūtas Qazaqstannyŋ jeŋısı bolmaq. Kök tuymyz jelbırese, ūltymyzdyŋ ruhy asqaqtaidy", – dedı Memleket basşysy.
Qasym-Jomart Toqaev atap ötkendei, sportşylarymyzǧa barlyq jaǧdai jasalyp jatyr.
"Eldı mekenderde arnaiy alaŋdar salynyp jatyr. Ötken jyldyŋ özınde 70-ke juyq sport ortalyǧy aşyldy. Biyl taǧy 200-ge juyq nysan salynady. Barşaŋyzǧa mälım, Ūlttyq olimpiada komitetınde özgerıster boldy. Olimpiada oiyndaryna daiyndyq ştaby qūryldy. Täjıribelı mamandardy şaqyrdyq. Belgılı sportşy Gennadii Golovkin keldı. Är salada osyndai öz ısınıŋ naǧyz şeberı boluǧa tiıs. Sonda ǧana nätije bolady. Bız – sportşylarǧa airyqşa qūrmet körsetetın elmız", – dedı Memleket basşysy.
Memleket basşysy sport tarihynda öşpes ız qaldyrǧan jerlesterımızdıŋ eŋbegı joǧary baǧalanyp jatqanyna nazar audardy.
"Baluan Şolaq, Qajymūqan Mūŋaitpasov, Jaqsylyq Üşkempırov, Aleksandr Vinokurov, Bekzat Sattarhanov, Olga Rypakova atyndaǧy sport nysandary – sonyŋ aiqyn körınısı. Sızder de biık belestı baǧyndyra alasyzdar. Men būǧan kämıl senemın. Bügıngı jastarymyz sızderge qarap boi tüzeidı. Būl – ülken abyroi", – dedı Qasym-Jomart Toqaev.
Baiandamada atap ötılgendei, bızdıŋ elımız ärqaşan beibıtşılık pen yntymaqtastyq saiasatyn ūstanady.
"Ötken aptada Astanada ŞYŪ sammitı tabysty ūiymdastyryldy. Būl maŋyzy zor şaranyŋ basty maqsaty memleketter men halyqtar arasyndaǧy dialogty, dostyq pen senımdı nyǧaitu boldy. Mūndai basymdyqtar küllı sport älemıne de tän. Öitkenı kez kelgen sport saiysy, eŋ aldymen, yntymaqtastyqty, alǧa ūmtylysty jäne adamdardyŋ bırlıgın körsetedı. Olimpiada oiyndarynyŋ qūndylyqtary qarapaiym sport jetıstıkterınen asyp tüsedı. Ol – jekelegen sportşylardyŋ da, tūtas memleketterdıŋ de teŋdıgınıŋ, özara qūrmetı men adal bäsekelestıgınıŋ jarqyn beinesı", – dedı Prezident.
Prezident sportşylarǧa elımızdı laiyqty tanytudaǧy jauapty missiia tūrǧanyna toqtalyp, olarǧa sättılık tıledı.
"Bärıŋız Olimpiada joldamasyn ielenu üşın köp küş jūmsadyŋyzdar. Özderıŋızdıŋ asqan şeberlıkterıŋızdı körsetıp, jaqsy nätijelerge qol jetkızetınderıŋızge senımdımın. Sızderge barşa Qazaqstan halqy qoldau körsetedı. Ärine, chempion bolu oŋai emes. Qazaqta «Namysqa şapsaŋ – alysqa şabasyŋ» degen söz bar. Sondyqtan jeŋımpaz bolasyzdar dep senemın", – dedı Memleket basşysy.
Toqaev ūlttyq qūrama kapitany Aslanbek Şymbergenovke Qazaqstan Respublikasynyŋ memlekettık tuyn tabys ettı.
Qazaqstan qūrama komandasynyŋ negızgı bölıgı kezdesuge Almaty oblysyndaǧy «Aqbūlaq» olimpiadalyq ortalyǧynan beinebailanys arqyly qatysty. Onda sportşylar Parij Olimpiadasy aldyndaǧy soŋǧy jattyǧu jiyndaryn ötkızıp jatyr.
«Sondai-aq ıs-şarada bokstan älem chempiony Aslanbek Şymbergenov, jeŋıl atletikadan Aziia oiyndarynyŋ jeŋımpazy Olga Safronova, dziudodan Olimpiada oiyndarynyŋ jüldegerı Eldos Smetov söz söiledı», - dep tolyqtyrdy Aqorda.
Ūqsas jaŋalyqtar
