Memleket basshysy Qasym-Jomart Toqaev 2024 jylǵy Olımpıadaǵa qatysýshylarǵa Qazaqstan týyn tabys etti, dep habarlaıdy "Adyrna" ulttyq portaly Aqordanyń baspasóz qyzmetine siltep.
«Prezıdent HHHIII jazǵy Olımpıada oıyndaryna qatysatyn Qazaqstan qurama komandasynyń múshelerine Memlekettik týdy tapsyrdy. Qasym-Jomart Toqaev Ulttyq qurama sportshylarymen kezdesýde Parıjde bastalatyn dúbirli dodany búkil álem asyǵa kútetinin ári oǵan tórtkúl dúnıe túgel kóz tigip otyrǵanyn aıtty. Sonymen qatar úzdikterdiń úzdigi baq synaıtyn baıraqty básekege eń myqty sportshylarymyz bara jatqanyn atap ótip, el namysyn qorǵaý abyroıly mindet ekenine toqtaldy», - delingen sársenbide taraǵan habarlamada.
Memleket basshysy atap kórsetkendeı, el namysyn qorǵaý – jaýapty da abyroıly paryz.
"Biz sizderge zor úmit artamyz. Búkil halqymyz – sizderge jankúıer. Jalpy, qazaq sport mektebiniń mártebesi qashanda bıik. Sportshylarymyz árdaıym elge júldemen oralyp júr. Osy dańqty joldy abyroımen jalǵaısyzdar dep senemin. Shyn máninde, sizderdiń jeńisterińiz tutas Qazaqstannyń jeńisi bolmaq. Kók týymyz jelbirese, ultymyzdyń rýhy asqaqtaıdy", – dedi Memleket basshysy.
Qasym-Jomart Toqaev atap ótkendeı, sportshylarymyzǵa barlyq jaǵdaı jasalyp jatyr.
"Eldi mekenderde arnaıy alańdar salynyp jatyr. Ótken jyldyń ózinde 70-ke jýyq sport ortalyǵy ashyldy. Bıyl taǵy 200-ge jýyq nysan salynady. Barshańyzǵa málim, Ulttyq olımpıada komıtetinde ózgerister boldy. Olımpıada oıyndaryna daıyndyq shtaby quryldy. Tájirıbeli mamandardy shaqyrdyq. Belgili sportshy Gennadıı Golovkın keldi. Ár salada osyndaı óz isiniń naǵyz sheberi bolýǵa tıis. Sonda ǵana nátıje bolady. Biz – sportshylarǵa aıryqsha qurmet kórsetetin elmiz", – dedi Memleket basshysy.
Memleket basshysy sport tarıhynda óshpes iz qaldyrǵan jerlesterimizdiń eńbegi joǵary baǵalanyp jatqanyna nazar aýdardy.
"Balýan Sholaq, Qajymuqan Muńaıtpasov, Jaqsylyq Úshkempirov, Aleksandr Vınokýrov, Bekzat Sattarhanov, Olga Rypakova atyndaǵy sport nysandary – sonyń aıqyn kórinisi. Sizder de bıik belesti baǵyndyra alasyzdar. Men buǵan kámil senemin. Búgingi jastarymyz sizderge qarap boı túzeıdi. Bul – úlken abyroı", – dedi Qasym-Jomart Toqaev.
Baıandamada atap ótilgendeı, bizdiń elimiz árqashan beıbitshilik pen yntymaqtastyq saıasatyn ustanady.
"Ótken aptada Astanada ShYU sammıti tabysty uıymdastyryldy. Bul mańyzy zor sharanyń basty maqsaty memleketter men halyqtar arasyndaǵy dıalogty, dostyq pen senimdi nyǵaıtý boldy. Mundaı basymdyqtar kúlli sport álemine de tán. Óıtkeni kez kelgen sport saıysy, eń aldymen, yntymaqtastyqty, alǵa umtylysty jáne adamdardyń birligin kórsetedi. Olımpıada oıyndarynyń qundylyqtary qarapaıym sport jetistikterinen asyp túsedi. Ol – jekelegen sportshylardyń da, tutas memleketterdiń de teńdiginiń, ózara qurmeti men adal básekelestiginiń jarqyn beınesi", – dedi Prezıdent.
Prezıdent sportshylarǵa elimizdi laıyqty tanytýdaǵy jaýapty mıssııa turǵanyna toqtalyp, olarǵa sáttilik tiledi.
"Bárińiz Olımpıada joldamasyn ıelený úshin kóp kúsh jumsadyńyzdar. Ózderińizdiń asqan sheberlikterińizdi kórsetip, jaqsy nátıjelerge qol jetkizetinderińizge senimdimin. Sizderge barsha Qazaqstan halqy qoldaý kórsetedi. Árıne, chempıon bolý ońaı emes. Qazaqta «Namysqa shapsań – alysqa shabasyń» degen sóz bar. Sondyqtan jeńimpaz bolasyzdar dep senemin", – dedi Memleket basshysy.
Toqaev ulttyq qurama kapıtany Aslanbek Shymbergenovke Qazaqstan Respýblıkasynyń memlekettik týyn tabys etti.
Qazaqstan qurama komandasynyń negizgi bóligi kezdesýge Almaty oblysyndaǵy «Aqbulaq» olımpıadalyq ortalyǵynan beınebaılanys arqyly qatysty. Onda sportshylar Parıj Olımpıadasy aldyndaǵy sońǵy jattyǵý jıyndaryn ótkizip jatyr.
«Sondaı-aq is-sharada bokstan álem chempıony Aslanbek Shymbergenov, jeńil atletıkadan Azııa oıyndarynyń jeńimpazy Olga Safronova, dzıýdodan Olımpıada oıyndarynyń júldegeri Eldos Smetov sóz sóıledi», - dep tolyqtyrdy Aqorda.
