قازاقستاننىڭ اباي، شىعىس قازاقستان، تۇركىستان جانە جامبىل وبلىستارىندا دابىلدى ەسكەرتۋ جاريالاندى. بۇل تۋرالى قازگيدرومەت جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، 8-10 شىلدە ارالىعىندا اتالعان ءتورت وبلىستا تاۋلى جانە تاۋ ەتەگىندەگى ايماقتاردا قاتتى جاۋىن-شاشىن سالدارىنان بەتكەيدەن سۋ اعىپ، وزەندەر دەڭگەيىنەن كوتەرىلەدى. سالدارىنان سۋ باسۋ قاۋپى تونەدى.
"سۋ دەڭگەيى قاۋىپتى دەڭگەيدەن اسىپ كەتكەن جاعدايدا، وزەندەردىڭ جايىلما اۋماقتارىندا ورنالاسقان ەلدى مەكەندەردى، شارۋاشىلىق قۇرىلىستاردى جانە جەرگىلىكتى ماڭىزى بار جولداردى سۋ باسۋ قاۋپى ساقتالادى", - دەپ ەسكەرتتى ۆەدومستۆو.
"قازاۆتوجول" دا جۇرگىزۋشىلەردى ساق بولۋعا شاقىردى.
"داۋىل كەزىندە قاتتى جاڭبىر مەن جەل بولۋى مۇمكىن. ونىڭ سالدارىنان جول كورىنبەي، ءىلىنىسۋ ناشارلايدى. جىلدامدىقتى ازايتىپ جانە قاۋىپسىز اراقاشىقتىقتى ساقتاڭىز. كەنەتتەن مانەۆر جاساماڭىز. دىمقىل جولدا كولىكتى كەنەت بۇرماڭىز جانە تەجەگىشتى باسپاڭىز، كولىك سىرعاناۋى مۇمكىن. كولىكتى ەركىن جۇرگىزىڭىز", - دەيدى ۆەدومستۆو ماماندارى.
ولار جۇرگىزۋشىلەرگە كولىكتىڭ جارىعىن جاعىپ جۇرگىزۋدى ۇسىنىپ، تەرەزە تازالاعىشتى تەكسەرۋ قاجەتتىگىن ەسكەرتتى.
"قاتتى جەل اعاشتى قۇلاتىپ، ونىڭ سىنىقتارى جولدا شاشىلىپ جاتۋى مۇمكىن. سوندىقتان مۇقيات بولىپ، كەدەرگىلەردەن اۋلاق بولىڭىز. سۋ باسقان ۋچاسكەلەردى بايقاڭىز، ەشقاشان تەرەڭ سۋ ارقىلى وتپەڭىز. سۋدان شۇڭقىرلار كورىنبەي، ءسىزدىڭ كولىگىڭىزگە زاقىم كەلۋى مۇمكىن", - دەيدى جول ماماندارى.
