مينيستر ونەر ادامدارىنىڭ ۇستالۋىنا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
مادەنيەت جانە اقپارات ءمينيسترى ايدا بالاەۆا ۇستالعان ونەر ادامدارىنا قاتىستى جاعدايلارعا پىكىر ءبىلدىردى.
"قوعامدى قارىشتاپ وسىرەتىن دە، تۇقىرتىپ وشىرەتىن دە - مادەنيەت. مادەنيەت تەك ونەر مەن ءبىلىم، وزات تالعام پەن تازالىق ەمەس. بۇل، ەڭ الدىمەن، ادامنىڭ ىشكى رۋحانياتى، حالىقتىڭ وركەنيەتتىك بولمىسى. ەندەشە، سول مادەنيەتتىڭ تۋىن كوتەرىپ، ونەردىڭ تاسىن ورگە دومالاتىپ جۇرگەن ءاربىر مايتالمان - ەلگە ۇلگى، قوعامعا باعدار بولۋى شارت. وكىنىشكە وراي، سوڭعى كەزدە مادەنيەت سالاسىنداعى بەلگىلى ازاماتتارعا قاتىستى جاعىمسىز وقيعالار، كەيدە ءتىپتى زاڭسىز ارەكەتتەر جيىلەپ كەتتى. ارينە، جەكە دارا ادام رەتىندە، قاراپايىم ازامات رەتىندە كىمگە بولسا دا پەندەشىلىك ءتان قاسيەت. ادام بولعان سوڭ قاتەلەسۋىڭ مۇمكىن، بىراق ونىڭ ارتى زاڭدى اتتاۋعا بارماۋى ءتيىس. ءوزىن ناعىز "مادەنيەت قايراتكەرىمىن" دەيتىن جان ءۇشىن تانىمالدىق زاڭسىزدىققا جول بەرەتىن قۇدىرەت ەمەس. ولار قاشان دا ۇلت مادەنيەتى دامۋىنىڭ قوزعاۋشى كۇشى سانالادى. سوندىقتان ولاردىڭ كوپكە ىقپالى تەك ونەگە، ناسيحات، جاقسىلىققا ارقاۋ بولۋى ءتيىس. مادەنيەت قايراتكەرلەرى زاڭ مەن ۇرپاق الدىنداعى وسىناۋ ۇلكەن جاۋاپكەرشىلىگىن ءتۇسىنۋى كەرەك. بۇل مەملەكەت باسشىسىنىڭ بارشا قازاقستاندىقتاردان تالاپ ەتىپ وتىرعان بىرەگەي ۇندەۋى. لاۋازىمىنا، تانىمالدىلىعىنا، قوعامداعى ورنىنا قاراماستان، زاڭ بارىنە ورتاق. ال مەملەكەت وسى قاعيدانىڭ مۇلتىكسىز ورىندالۋىن قامتاماسىز ەتەتىن بولادى", - دەدى مينيستر Facebook جەلىسىندەگى پاراقشاسىندا.
