2 شىلدەدەن باستاپ استانا، الماتى، قاراعاندى جانە كوكشەتاۋ قالالارىندا تەرروريستىك قاۋىپتىلىكتىڭ «سارى» دەڭگەيى بەكىتىلەدى. بۇل تۋرالى بۇگىن ۇقك ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«قازاقستاندا شىلدەنىڭ 2-5 ارالىعىندا بىرقاتار ماڭىزدى حالىقارالىق ءىس-شارالار، ونىڭ ىشىندە شانحاي ىنتىماقتاستىق ۇيىمىنا مۇشە مەملەكەتتەر باسشىلارىنىڭ كەڭەسى مەن قىتاي حالىق رەسپۋبليكاسى توراعاسىنىڭ مەملەكەتتىك رەسمي ساپارى وتەدى.
وسىعان وراي الەمگە بەلگىلى تاجىريبەگە سايكەس ۋاكىلەتتى مەملەكەتتىك ورگاندار كەلەتىن شەتەلدىك دەلەگاتسيالاردىڭ، ولاردىڭ ىشىندە مەملەكەت باسشىلارى مەن حالىقارالىق ۇيىمدار باسشىلارىنىڭ قاۋىپسىزدىگىن جوعارى دەڭگەيدە قامتاماسىز ەتۋگە تولىققاندى شارالار قابىلدايدى»،— دەلىنگەن حابارلامادا.
«تەرروريزمگە قارسى ءىس-قيمىل تۋرالى» زاڭنىڭ 12, 13 جانە 15-باپتارىنا سايكەس كۇزەتىلەتىن تۇلعالاردىڭ قاۋىپسىزدىگىن قامتاماسىز ەتۋ بويىنشا كۇزەت ءىس-شارالارىن وتكىزۋ كەزىندە مەملەكەتتىك كۇزەت قىزمەتى باستىعىنىڭ شەشىمى بويىنشا استانا، الماتى، قاراعاندى جانە كوكشەتاۋ قالالارىنىڭ جەكەلەگەن ۋچاسكەلەرىندە تەرروريزمگە قارسى وپەراتسيانىڭ قۇقىقتىق رەجيمىندە قۇقىقتىق ءتارتىپ پەن قوعامدىق قاۋىپسىزدىكتى قولداۋ ءىس-شارالارى وتەدى.
قۇقىقتىق رەجيم 2 شىلدەنىڭ 00 ساعات 01 مينۋتىنان باستاپ 4 شىلدەنىڭ 23 ساعات 59 مينۋتىنا دەيىن شانحاي ىنتىماقتاستىق ۇيىمىنىڭ ءسامميتى وتكىزىلەتىن وبەكتىلەر اۋماعىنا جانە كۇزەتىلەتىن تۇلعالاردىڭ ءجۇرۋ باعىتتارىنا ورناتىلادى.
بۇدان باسقا، پرەزيدەنتتىڭ 2013 جىلعى 9 تامىزداعى №611 جارلىعىمەن بەكىتىلگەن «تەرروريزم اكتىسى قاتەرىنىڭ تۋىنداۋى تۋرالى اقپارات مونيتورينگىنىڭ جانە حالىقتى حاباردار ەتۋدىڭ مەملەكەتتىك جۇيەسىنىڭ ۇيىمداستىرىلۋى مەن جۇمىس ىستەۋ قاعيدالارىنا» سايكەس تەرروريزمگە قارسى وپەراتسيانىڭ قۇقىقتىق رەجيمى ەنگىزىلۋىن ەسكەرە وتىرىپ، استانا، الماتى، قاراعاندى جانە كوكشەتاۋ قالالارىنىڭ شانحاي ىنتىماقتاستىق ۇيىمىنىڭ ءسامميتىن وتكىزۋ وبەكتىلەرىندە 2 شىلدەنىڭ 00 ساعات 01 مينۋتىنان باستاپ 4 شىلدەنىڭ 23 ساعات 59 مينۋتىنا دەيىن تەرروريستىك قاۋىپتىلىكتىڭ بىرقالىپتى («سارى») دەڭگەيى بەلگىلەنەدى.
ياعني:
- جەكەلەگەن اۋماقتاردا كولىك پەن جاياۋ جۇرگىنشىلەردىڭ قوزعالىسى شەكتەلەدى;
- بۇقارالىق جانە جاپپاي ءىس-شارالار وتەتىن ورىنداردا پاترۋل كۇشەيەدى;
- ادامدار كوپ جينالاتىن ورىندار تەكسەرىلەدى;
- اۋەجايلاردا، تەمىرجول ۆوكزالدارىندا ارنايى تەحنيكا قولدانىلادى.
