Almatyda qoǵamdyq kólikte jol júrý aqysy 20 teńgege kóterilýi múmkin. Búgin, 1 shildede qala ákimdiginiń qaýly jobasy qoǵammen talqylaný úshin «Ashyq NQA» saıtynda jarııalandy, dep habarlaıdy «Adyrna» tilshisi.
Qalalyq mobıldilik basqarmasy bıyl qoǵamdyq kólikte jol júrý úshin ortasha tarıf 310 teńge, al keıbir marshrýtta 400 teńgege jetetinin málimdedi. Aıtýlarynsha, osyǵan baılanysty jyl saıyn tasymaldaýshylarǵa tólenetin sýbsıdııa mólsheri ósip jatyr. 2023 jyly 68,7 mıllıard teńge bólinse, 2024 jyly sýbsıdııanyń boljamdy somasy 97,3 mıllıard teńgege deıin ulǵaıǵan.
«Qala tasymaldaýshylary qoldanystaǵy tarıf tasymaldaýshylardyń avtobýs satyp alýǵa, jańartýǵa jáne ýaqytyly qyzmet kórsetýge, sondaı-aq júrgizýshilerdiń jalaqysyn kóterýge jumsaǵan shyǵyndy ótemeıdi dep birneshe ret habarlady. Tasymaldaýshylarǵa jáne jergilikti bıýdjetke júktemeni ishinara azaıtý maqsatynda qalalyq qatynastarda jolaýshylar men bagajdy avtomobılmen turaqty tasymaldaýǵa tarıf belgileý týraly qala ákimdigi qaýlysynyń jobasy daıyndaldy. Joba jol júrý tarıfin 120 teńgege deıin kóterýdi kózdeıdi. Tıisinshe, azamattardyń jeńildetilgen sanattary úshin jol júrý quny tarıftiń 50%-y bolady»,— delingen basqarmanyń habarlamasynda.
Aıta keteıik, Almatyda jol júrý aqysy 2023 jyldyń tamyzynda ósken bolatyn. Qazirgi tańda qalada qoǵamdyq kóliktegi tarıftiń quny qolma-qol aqshasyz tásilmen tólegen kezde 100 teńge, al qolma-qol tólegen kezde 200 teńge mólsherinde belgilengen.
