سۋ تاسقىنىنان بۇلىنگەن ۇيلەردى جوندەۋ ءۇشىن 257 ملرد تەڭگە كەرەك

«شامامەن 67 مىڭ ادام ءوز ۇيىنە ورالدى، ەۆاكۋاتسيالىق پۋنكتتەردەگى 3664 تۇرعىنعا قاجەت بارلىق كومەك كورسەتىلىپ جاتىر. سۋ تاسقىنى باستالعالى بارلىعى 12 مىڭ 86 تۇرعىن ءۇي مەن 7 380 ساياجاي (جالعىز باسپانا) سۋ استىندا قالدى. جالپى زارداپ شەككەن وڭىرلەردە 18 228 تۇرعىن ءۇي زەرتتەلىپ (94%), 15 651 نىسان بويىنشا باعالاۋ اياقتالدى (81%)»، - دەدى قانات بوزىمباەۆ.

ۆيتسە-پرەمەر سۋ تاسقىنىنان كەيىن 9 306 باسپانا قالپىنا كەلتىرۋگە بولاتىن، ال 8 190 باسپانا قايتا جوندەۋگە كەلمەيتىن ساناتقا جاتقىزىلعانىن ايتادى.

"ولار بويىنشا قايتالاما نارىقتان 5 714 باسپانا ساتىپ الۋ جانە 2 506 تيپتىك جوبادا باسپانا قۇرىلىستارى جوسپارلانعان. جالپى تۇرعىن ءۇيدى قالپىنا كەلتىرۋگە شامامەن 257 ملرد تەڭگە كەرەك", - دەدى قانات بوزىمباەۆ.

ۇكىمەت باسپانانى جوندەۋگە جانە قالپىنا كەلتىرۋ ءۇشىن 6 176 وتباسىعا 40 ملرد تەڭگە وتەماقى تولەگەن.

ۇكىمەت باسشىسىنىڭ ورىنباسارى تابيعي اپاتتان زارداپ شەككەن تۇرعىندارعا 369 200 تەڭگە (100 اەك، 1 اەك – 3 692 تەڭگە) كولەمىندە بىرجولعى تولەم تولەنگەنىن اتاپ ءوتتى. ۆيتسە-پرەمەر تۇرعىندارعا تۇرمىستىق تەحنيكا الۋعا 7,6 ملرد تەڭگە بەرىلگەنىن جەتكىزدى.

"باعالاۋ اياقتالعاننان كەيىن زارداپ شەككەن تۇرعىندارعا 150 اەك (553 800 تەڭگە) مولشەرىندە  جوعالعان قاجەت زاتتاردى ساتىپ الۋ ءۇشىن قوسىمشا وتەماقى تولەنۋدە. 7,6 ملرد تەڭگە كولەمىندە 15 355 وتباسى وتەماقى الدى. مال شىعىنى ءۇشىن مەملەكەتتىك كومەك كولەمى 2,8 ملرد تەڭگەدەن استى", - دەدى قانات بوزىمباەۆ.

سونىمەن قاتار بيزنەسكە كەلگەن زالالدى وتەۋ بويىنشا جۇمىس باستالعان. بۇلىنگەن ينفراقۇرىلىمدى قالپىنا كەلتىرۋگە قوماقتى قاراجات كەرەك.

«الدىن الا باعالاۋ بويىنشا، اكىمدىكتەردىڭ وتىنىمدەرىنە سايكەس ينفراقۇرىلىمدى قالپىنا كەلتىرۋ ءۇشىن ۇكىمەت رەزەرۆىنەن 48,7 ملرد تەڭگە قاجەت. بۇل قاراجات اۆتوموبيل جولدارىن، ەلەكترمەن جابدىقتاۋ جەلىلەرىن قالپىنا كەلتىرۋگە جانە الەۋمەتتىك نىسانداردى جوندەۋگە باعىتتالادى. بۇگىندە 39,8 ملرد تەڭگەگە جوبالار دايىندالىپ، قۇجاتتامانىڭ قارجى مينيسترلىگىنە ۇسىنىلدى»، - دەدى قانات بوزىمباەۆ.