ۇكىمەت باسشىسىنىڭ ورىنباسارى قانات بوزىمباەۆ جۋرناليستەرگە وسەك تىڭداماۋعا كەڭەس بەردى، دەپ حابارلايدى “ادىرنا” ۇلتتىق پورتالى.
ءجۋرناليستىڭ “بۇعان دەيىن ءسىز پرەمەر-مينيستر بولادى دەگەن اڭگىمە كوپ ايتىلدى. بۇعان ءوزىڭىز نە ايتاسىز؟” دەگەن سۇراعىنا قانات الدابەرگەنۇلى “مەن سىزگە كەڭەس بەرەيىن. تاڭەرتەڭ توسەكتەن تۇرعاندا وسەك تىڭداماڭىز” دەپ جاۋاپ بەردى.
ايتا كەتسەك، قانات بوزىمباەۆ سۋ تاسقىنىنان كەيىن پرەمەر-ءمينيستردىڭ ورىنباسارى لاۋازىمىنا تاعايىندالىپ، تاسقىننىڭ سالدارىن جويۋعا جاۋاپتى ادام بولدى.
ولجاس بەكتەنوۆ قىزمەتىنەن كەتەدى دەگەن سىبىس تاراعاندا ينتەرنەتتە پرەمەر-ءمينيستردىڭ كىم بولاتىنى تۋرالى بولجامدى اقپاراتتار جازىلدى.
ينتەرنەتتە تاراعان مالىمەتكە قاراعاندا، ولجاس بەكتەنوۆ پرەزيدەنت توقاەۆقا قىزمەتىنەن بوساتىپ، قاۋىپسىزدىك بلوگىنداعى جۇمىسىنا قايتارۋ تۋرالى وتىنىشپەن جۇگىنگەننەن كەيىن، ونىڭ ورنىنا پرەمەر-ءمينيستردىڭ ورىنباسارلارى رومان سكليار مەن قانات بوزىمباەۆتىڭ بىرەۋى بولاتىنى ايتىلعان.
اسىرەسە، مەملەكەت باسشىسىنىڭ سەنىمىنە يە بولعاندىقتان، بوزىمباەۆتىڭ جوعارىلاۋ مۇمكىندىگى جوعارى ەكەنى دە ايتىلعان. وعان قوسا، ول سوڭعى ەكى جىلدا قازاقستاندىق ءىرى بيزنەسمەندەرمەن قارىم-قاتىناسقا قاتىستى بىرقاتار تاپسىرمالاردى ورىنداعان ەدى. بيىلعى سۋ تاسقىنى كەزىندە قازىرگى قىزمەتىنە تاعايىندالعان بوزىمباەۆ بيلىكتەگى بەلسەندىلىگىمەن بەلگىلى بولا باستاعان.
