قاجىلىققا اتتانعاندار اپتاپ ىستىقتان كوز جۇمۋدا. رەسمي دەرەكتەردە 500-دەن استام ءتۋريستىڭ مەككەدە قايتىس بولعانى ايتىلدى، دەپ حابارلايدى “ادىرنا” ۇلتتىق پورتالى.
ۆۆس اگەنتتىگىنىڭ مالىمەتىنشە مەككەدەگى ءولىمنىڭ بىرنەشە سەبەبى انىقتالعان.
ءبىرىنشى سەبەپ – قاتتى ىستىق. اگەنتتىك مالىمەتىنشە اجالدىڭ باستى سەبەبى وسى فاكتور. مەككەدە بۇل جولى كولەڭكەدەگى اۋا تەمپەراتۋراسى 51 گرادۋستان جوعارى بولعان جانە تەك تۇندە كەيدە 40-تان تومەن تۇسكەن.
ەكىنشى سەبەپ - سانيتارلىق تازالىق. تۋريستەردىڭ كوبى بيىل مەككەدە ءجۇرىپ-تۇرۋدىڭ قيىندىعىنا شاعىمدانعان. سەبەبى شاتىرلار قوقىسقا تولعان. سونىمەن قاتار كەيبىر جەردە سالقىنداتۋ جۇيەسى بولماعان.
ءۇشىنشى ماسەلە - جولداعى كەدەرگى. كەيبىر دەرەكتەردە قاجىلىق كەزىندە تۋريستەردىڭ اپتاپ ىستىقتا جاياۋ جۇرۋگە ءماجبۇر بولعانى ايتىلۋدا. قاجىلاردىڭ ءبىرى جەتى شاقىرىم كولەڭكەسىز جانە ءبىر تامشى سۋسىز ءجۇرىپ، جول كەدەرگى كوپتىگىن ايىپتاعان.
ءتورتىنشى ماسەلە - مەديتسينالىق كومەكتىڭ جەتىسپەۋشىلىگى. قاجىلىققا كەلگەندەردىڭ باسىم كوپشىلىگى مەديتسينالىق كومەكتىڭ جوقتىعىنا شاعىمدانعان. ولار جەدەل جاردەم كولىكتەرىن ۇزاق كۇتىپ، كەيبىرى مەديتسينا قىزمەتكەرلەرىنىڭ نەمقۇرايلى بولعانىن ايتقان.
بيىل قاجىلىقتا قۇجاتسىز قاجىلار دا كەزدەسكەن.
ودان بولەك ەگدە جاستاعى، ءالسىز نەمەسە ناۋقاس قاجىلار كوپ. ولاردىڭ دەنساۋلىعى قاجىلىققا جارامايدى. الايدا كوپتەگەن تۋريستەر سوعان قاراماستان مەككەگە اتتانعان.
