كىشكەنتاي بالالارعا يت-مىسىقتىڭ ەتىن بەرىپ قيناعان شىمكەنتتىك ەمشى جازادان قۇتىلىپ كەتتى. ويتكەنى سوت ساراپتاماسى ناتيجەسىندە ۇلىقبەك سمانوۆتىڭ پسيحولوگيالىق اۋىتقۋى بار ەكەنى انىقتالعان، دەپ حابارلايدى «ادىرنا»تىلشىسى Almaty.tv-عا سىلتەمە جاساپ.
جابىق سوتتا ەمشىنىڭ بۇل العاشقى قىلمىسى ەمەس ەكەنى دە ايتىلدى. 53 جاستاعى سمانوۆ 30 جىل بۇرىن ابايسىزدا ادام ءولتىرۋ بابىمەن سوتتى بولعان. الايدا جۇيكەسىنىڭ اۋىتقۋىنا بايلانىستى تەمىر تورعا ەمەس، اۋرۋحاناعا جاتقىزىلعان. بىراق ەسەپكە سول كۇيى ەنبەگەن. ادۆوكات جەتىمدەر ومىرىنە نەمقۇرايلى قاراعان ءبىلىم باسقارماسىن دا كىنالادى.
«ەگەر ەمدەلىپ جاتسا، بوستاندىققا شىعادى. ول 1995 جىلدان بەرى شيزوفرەنيا دياگنوزىمەن ەسەپتە تۇر. بۇل ىستە استانا، الماتى، شىمكەنت قالالارىنداعى ءبىلىم باسقارماسىنىڭ كەمشىلىگى كوپ. سمانوۆ بۇرىن وسىلاي جاۋاپكەرشىلىككە تارتىلعانى، ەسەپتە تۇرعانى بەلگىلى. جۇيكە اۋرۋى شيزوفرەنيامەن جاس كەزىنەن باستاپ اۋىرعان. سونى ەسكەرمەستەن بالالاردى اسىراۋعا بەرگەن»،—دەدى سمانوۆتىڭ قورعاۋشىسى ۋبادۋللا نۇرمانوۆ.
1990 جىلدارى اتاعى دۇركىرەگەن ەمشى 6 رەت ۇيلەنگەن. بىراق نەكەسىنىڭ بەسەۋى ءساتسىز اياقتالىپ ارادا بالا بولماعان. ال سوڭعى ايەلىمەن 6 بالانى اسىراپ الىپتى. ول ءۇشىن ءتىپتى ارنايى كۋرستان ءوتىپ، سەرتيفيكات دا العان كورىنەدى.
«كۇدىكتى ايەلىمەن 2021 جىلى ءۇش ايلىق پسيحولوگيالىق دايىندىق كۋرسىن ءبىتىرىپ، ءتيىستى سەرتيفيكات العان. وسىدان كەيىن ولار ەلەكتروندى پورتال ارقىلى بالا اسىراپ الۋ تۋرالى ءوتىنىش جولداعان. بارلىق ۇسىنىلعان قۇجات مۇقيات تەكسەرىلدى. پسيحيكالىق اۋىتقۋلار نەمەسە سەرتيفيكات بولعان جوق. سوتتىلىعى دا بولماعان. تەك وقيعادان كەيىن ونىڭ دەنساۋلىق جاعدايى دا، سوتتىلىعى دا دەرەكتەر بازاسىندا پايدا بولدى»،—دەدى ءبىلىم باسقارماسىنىڭ قورعانشىلىق جانە قامقورشىلىق ءبولىمىنىڭ باسشىسى نۇرداۋلەت ابىلاەۆ.
ايتا كەتەيىك، بالالاردىڭ ەكەۋى وسكەمەن، قالعاندارى استانا، الماتى جانە شىمكەنتتەگى بالالار ۇيىنەن ەكەن. قازىر ولار قايتادان وزدەرى شىققان بالالار ۇيىنە تابىستالماق. ال كامەلەت جاسىنا تولماعانداردى قيناۋ بابىمەن كۇدىككە ءىلىنىپ، جازادان قۇتىلعان سمانوۆتىڭ ايەلىنە قاتىستى ازىرگە ەشقانداي قىلمىستىق ءىس قوزعالعان جوق.
بۇعان دەيىن شىمكەنتتىك ەمشىنىڭ اسىراپ العان 6 بالاسىن ازاپتاعانىن جازعان ەدىك.
