بەلگىلى قۇقىق قورعاۋشى مارگاريتا وسكەمباەۆا 17 ماۋسىمدا دۇنيەدەن ءوتتى، دەپ حابارلايدى "ادىرنا" ۇلتتىق پورتالى.
مارگاريتا وسكەمباەۆا - تەڭ قۇقىقتار مەن تەڭ مۇمكىندىكتەر ينستيتۋتىنىڭ نەگىزىن قالاۋشى، ايەلدەر مەن بالالار قۇقىقتارى ءۇشىن كۇرەسكەن كۇرەسكەر ايەل، قازاقستانداعى العاشقى فەمينيستەردىڭ ءبىرى. ول پسيحولوگ بولىپ جۇمىس ىستەپ، عىلىمي زەرتتەۋلەر جۇرگىزدى. كوزى تىرىدە تۇرمىستىق زورلىق-زومبىلىق قۇرباندارىنا ارنالعان «اراشا» باسپاناسىن باسقاردى. ودان بولەك، قازاقستان پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ دا مۇشەسى بولعان.
مارگاريتا وسكەمباەۆانىڭ قازاسى تۋرالى دەپۋتات يرينا سميرنوۆا ءبولىستى.
«ۇزاق ۋاقىت بويى ول ەشبىر قولداۋسىز، اقىسىز، گرانتسىز، مەكتەپ پەن بالاباقشادا پسيحولوگ بولىپ جۇمىس ىستەپ، قوعامدىق قىزمەت اتقاردى. سودان كەيىن ول ايەلدەرگە ارنالعان داعدارىس ورتالىعىن ۇيىمداستىرۋ ءۇشىن وتە از مەملەكەتتىك گرانت الدى. ول بۇنى جۇرەگىمەن جاسادى. ايەلدەرگە مەديتسينالىق كومەك، قۇقىقتىق قولداۋ جانە پسيحولوگيالىق قولداۋ كورسەتۋ مۇمكىندىگىن قامتاماسىز ەتتى. ول ايەلدەردىڭ ماماندىق الۋى ءۇشىن جانە ونىمەن بىرگە وزىنە دەگەن سەنىمدىلىگى ءۇشىن قولىنان كەلگەنشە كومەك بەردى. ول ورتالىققا اناسىمەن بىرگە تۇسكەن بالالارعا دا قامقورلىق جاسادى. ولاردى مەكتەپ پەن بالاباقشاعا ورنالاستىردى»،– دەپ دەپۋتات يرينا سميرنوۆا ەستەلىكتەرىمەن ءبولىستى.
مارقۇمدى جەرلەۋ ءراسىمى 18 ماۋسىم كۇنى ءوزىنىڭ تۋعان اۋىلىندا وتەدى.
