مەملەكەتكە وپاسىزدىق جاسادى دەپ ايىپتالعان ۇلتتىق قاۋىپسىزدىك كوميتەتىنىڭ (ۇقك) بۇرىنعى توراعاسى كارىم ماسىموۆتەن راقىمشىلىققا ىلىگۋ ءۇشىن قاڭتار وقيعاسى تۋرالى بار شىندىقتى ايتۋىن سۇراۋ كەرەك. بۇل تۋرالى ءماجىلىس دەپۋتاتى ەرمۇرات باپي ايتتى، دەپ حابارلايدى “ادىرنا” ۇلتتىق پورتالى «Orda.kz» سايتىنا سىلتەپ.
«مەن ءوز باسىم ءماسىموۆتى ۇيىمداستىرۋشى دەپ ويلامايمىن. ول قاۋىپسىزدىك كەڭەسى توراعاسىنىڭ بۇيرىقتارىن ورىنداۋعا ءماجبۇر بولدى. كارىم ءماسىموۆ كوپ جىلدار بويى پرەمەر-مينيستر جانە نازارباەۆتىڭ سەنىمدى ادامى بولعانىن اتاپ وتەمىن. ول ءوزىنىڭ جەكە تاپسىرماسىن ورىنداپ قانا قويماي، تۇڭعىش پرەزيدەنتتىڭ جەكە ىسىمەن دە اينالىستى. ءماسىموۆ اتاقتى «قازاقگەيتتەن» كەيىن ەۋروپادان ءوز اكتيۆتەرىن شىعارىپ جاتقان، سونىمەن قاتار «ەسكى قازاقستاننىڭ» اكتيۆتەرىن وڭتۇستىك-شىعىس ازيادا، قىتايدا، شانحايدا، گونكونگتا جانە امىرلىكتەردە ورنالاستىرۋعا قاتىسقان. ەگەر ءماسىموۆ بارلىق ترانزاكتسيالاردى اشكەرەلەپ، ونىڭ ورنىنا بوستاندىق سۇرايتىن بولسا، وعان بۇل راقىمشىلىق جاساۋ كەرەك دەپ ويلايمىن»، - دەيدى ءماجىلىس دەپۋتاتى ەرمۇرات باپي.
ءباپيدىڭ ايتۋىنشا، كارىم ءماسىموۆ قاڭتار وقيعاسىن ۇيىمداستىرا الماعان. ءماسىموۆ قاڭتارداعى وقيعالاردىڭ بارلىق تىزبەگىن كورسەتىپ، باستى ۇيىمداستىرۋشىنى اتاۋى كەرەك.
«ءبىز ءۇشىن ونى تۇرمەدە ۇستاۋدان گورى، تاركىلەنگەن مۇلىكتەر تۋرالى اقپاراتتى انىقتاۋ ماڭىزدىراق. ونىڭ تۇرمەدە وتىرعانىنان حالىققا پايدا جوق»، – دەيدى باپي.
ەسكە سالايىق، 2023 جىلدىڭ 24 ساۋىرىندە استانا سوتى قر ۇلتتىق قاۋىپسىزدىك كوميتەتىنىڭ بۇرىنعى باسشىسى كارىم ماسىموۆكە قاتىستى قر قك 175-بابىنىڭ 1-بولىگى (مەملەكەتكە وپاسىزدىق), 3-بولىگى بويىنشا 18 جىلعا سوتتاعان بولاتىن. ونىڭ بۇرىنعى ورىنباسارلارى ءانۋار سادىقۇلوۆ 16, داۋلەت ەرعوجين جانە مارات وسيپوۆ 15 جانە ءۇش جىلعا سوتتالدى.
10 ماۋسىمدا ءماسىموۆ قازاقستان پرەزيدەنتى قاسىم-جومارت توقاەۆتان كەشىرىم سۇراعانى بەلگىلى بولدى.
