قازاقستان اقش-تىڭ تاياۋ شىعىستاعى جاعدايدى تۇراقتاندىرۋ جونىندەگى باستاماسىن قولدادى، دەپ حابارلايدى “ادىرنا” ۇلتتىق پورتالى سىرتقى ىستەر مينيسترلىگىنىڭ ءباسپاسوز قىزمەتىنە سىلتەپ.
«قازاقستان حالىقارالىق قاۋىمداستىقتىڭ تاياۋ شىعىستاعى جاعدايدى تۇراقتاندىرۋعا باعىتتالعان كۇش-جىگەرىن تاباندى تۇردە قولدايدى. «ءبىز اق ءۇيدىڭ بىتىمگەرشىلىك باستاماسىن قۇپتايمىز، ونىڭ نەگىزگى ەرەجەلەرى يزرايل مەن حاماس اراسىنداعى اتىستى توقتاتۋ، كەپىلگە الىنعانداردى بوساتۋ، گۋمانيتارلىق كومەك كورسەتۋ جانە حالىقارالىق قاۋىمداستىقتىڭ قولداۋىمەن گازا سەكتورىن كەيىننەن قالپىنا كەلتىرۋ»، - دەلىنگەن مالىمدەمەدە.
سىرتقى ىستەر مينيسترلىگى ۇسىنىلعان شارالار جۇزەگە اسىرىلسا، بەيبىت تۇرعىندار اراسىنداعى قانتوگىس پەن قۇرباندىقتى توقتاتادى، سونىمەن قاتار ايماقتا بەيبىتشىلىككە قول جەتكىزۋ ءۇشىن العىشارتتار جاسايدى دەپ ۇمىتتەنەدى.
«ءبىز ۇزاق مەرزىمدى قاقتىعىستىڭ جالعىز شەشىمى «ەكى حالىققا ەكى مەملەكەت» فورمۋلاسى نەگىزىندە استاناسى شىعىس يەرۋساليم بولاتىن پالەستينا مەملەكەتىن قۇرۋ ەكەندىگى تۋرالى قازاقستاننىڭ وزگەرمەگەن ۇستانىمىن راستايمىز»، - دەپ حابارلادى سىرتقى ىستەر مينيسترلىگى.
