رەسەي پرەزيدەنتىنىڭ ءباسپاسوز حاتشىسى دميتري پەسكوۆتىڭ قىزى قازاقستاندا جەكە سايكەستەندىرۋ ءنومىرىن الدى، دەپ حابارلايدى “ادىرنا” ۇلتتىق پورتالى «ناستوياششەە ۆرەميا» باسىلىمىنا سىلتەپ.
دميتري پەسكوۆتىڭ قىزى ەليزاۆەتا جسن-گە يە بولدى.
«رەسەي پرەزيدەنتىنىڭ ءباسپاسوز حاتشىسىنىڭ قىزىنىڭ اتى-ءجونى ەليزاۆەتا پەسكوۆا قازاقستاندا جەكە سايكەستەندىرۋ ءنومىرىن (جسن) الدى; تۋعان كۇندەرى دە سايكەس كەلەدى»، - دەپ جازىلعان باسىلىم مالىمەتىندە.
مالىمەتتەر قازاقستاننىڭ ۇلتتىق كۋالاندىرۋ ورتالىعىنىڭ ونلاين رەەسترىنەن جانە باسقا دا دەرەكتەر بازالارىنان تابىلعان.
رەسەيلىك باق ەليزاۆەتا پەسكوۆانىڭ 2022 جىلدىڭ قىركۇيەگىنە دەيىن جسن العانىن ايتادى. وعان دالەل جسن نۇر-سۇلتان قالاسى بويىنشا مەملەكەتتىك كىرىستەر دەپارتامەنتىنە بەرىلگەن. باس قالا نۇر-سۇلتان اتاۋىنان استاناعا 2022 جىلى قىركۇيەگىندە وزگەرتىلگەن.
ايتا كەتەيىك، ۆلاديمير ءپۋتيننىڭ ءباسپاسوز حاتشىسىنىڭ قىزى 2022 جىلدىڭ ناۋرىزىندا اقش-تىڭ، بىرنەشە ايدان كەيىن ەۋروپالىق وداق سانكتسيالارىنا ۇشىراعان.
باسىلىم اقپاراتىنشا، رەسەي مەن ۋكراينا اراسىنداعى سوعىس باستالعاننان كەيىن رەسەيلىكتەر جەرگىلىكتى بانكتەردە شوت اشۋ جانە Visa مەن Mastercard قويعان شەكتەۋلەردى اينالىپ ءوتۋ ءۇشىن قازاقستان رەسپۋبليكاسىندا جاپپاي جسن-گە ءوتىنىم بەرە باستاعان.
