ءماجىلىس دەپۋتاتى ەرمۇرات باپي ەكس-پرەزيدەنتتىڭ قىزى ءاليا نازارباەۆا مەن كاسىپكەر نۇرلان ءبيمۋرزيننىڭ اراسىنداعى داۋعا قاتىستى پىكىر ءبىلدىردى، دەپ حابارلايدى “ادىرنا” ۇلتتىق پورتالى.
«مەن ءبارىن ءوز كوزىممەن كوردىم. ءاليا نازارباەۆانىڭ قولى قويىلعان نوتاريالدىق قۇجاتتاردىڭ تۇپنۇسقاسىن كوردىم. مەن ونىڭ قول قويعان كەلىسىم-شارتىن، كومپانيانى قابىلداۋ تۋرالى قۇرىلتاي قۇجاتىن كوردىم. مەن روگوۆانىڭ ادۆوكاتى قول قويعان قۇجاتتاردى كوردىم. بۇل كوك ءمورى مەن قولى بار قۇجاتتار. ولار اسپاننان تۇسكەن جوق. ەشكىم ولاردى قولدان جاساعان جوق. بىراق مۇنداي قىلمىستىڭ سالدارىنان مۇلكىنەن ايىرىلعان ادامداردى سوتقا بەرۋ – ارسىزدىق»، – دەيدى ەرمۇرات باپي.
جۋرناليستەر دەپۋتاتتان "پروكۋراتۋرا مەن سوت جۇيەسى ءاليا نازارباەۆانىڭ جاعىنا شىعا ما؟"- دەپ سۇرادى.
- ولار قازىردىڭ وزىندە ونىڭ جاعىندا سياقتى. مەن دەپۋتاتتىق ساۋال جولدادىم، جالتارعان جاۋاپ الدىم. 160 ميلليارد تەڭگە كاپيتالىمەن بيزنەسىنەن ايىرىلعان جىگىتتەر سوتقا شاعىم ءتۇسىردى. ولار پروكۋراتۋراعا شاعىم ءتۇسىردى. ولاردىڭ ەشقايسىسىنا ءالى دۇرىس جاۋاپ جوق. جان-جاقتان قاراساق، قۇددى ءاليا نازارباەۆانىڭ تۇك قاتىسى جوق سياقتى اسەر قالدىرادى، - دەپ اتاپ ءوتتى ول.
ەسكە سالا كەتەيىك، اقپان ايىندا ءاليا نازارباەۆا قۇنى 170 ميلليون دوللار بولاتىن بيزنەستى رەيدەرلىك جولمەن تارتىپ الدى دەپ ايىپتالعان بولاتىن.
وعان قوسا كونستيتۋتسيالىق كەڭەس توراعاسى، پرەزيدەنت كومەكشىسى، پرەزيدەنت كەڭەسشىسى قىزمەتتەرىن اتقارعان يگور روگوۆتىڭ ايەلى ۆالەنتينا روگوۆا قىلمىسقا سىبايلاس بولعان دەگەن بولجام ايتىلدى.
كەيىن ءاليا نازارباەۆانىڭ ءبيمۋرزيننىڭ ۇستىنەن پوليتسياعا ارىز جازعانى بەلگىلى بولدى.
