پەتروپاۆلدا ءۇيىن جارىپ جىبەرگەن 95 جاستاعى زەينەتكەر قايتىس بولدى. بۇل تۋرالى سقو دەنساۋلىق ساقتاۋ باسقارماسىنىڭ وكىلدەرى ايتتى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، زەينەتكەر 26 مامىرعا قاراعان ءتۇنى قايتىس بولعان.
قاريانىڭ دەنەسىنىڭ 60 پايىزىن كۇيىك شالعان. دارىگەرلەردىڭ سوزىنشە، مۇنداي جاعدايلاردا تەرى نەكروزى (دەنە تىندەرىنىڭ بۇزىلۋى) بولادى.
ەسكە سالا كەتەيىك، 22 مامىر كۇنى پەتروپاۆلدا ايەلىمەن جانجالداسقان قاريا ءوزىن ولتىرمەك بولىپ گاز باللونىن جارىپ جىبەرگەنىن حابارلاعان ەدىك.
كورشىلەرىنىڭ ايتۋىنشا، زەينەتكەر باقشاسىنا كارتوپتى كىمنىڭ وتىرعىزعانىن ۇمىتىپ قالىپ شۋ شىعارعان كورىنەدى.
جانجال قالا شەتىندەگى جەر ۇيدە بولعان. كورشىلەرى ەكى رەت گۇرس ەتكەن جارىلىستى ەستىگەن. وسى ساتتە باسپانانىڭ كۇلى كوككە ۇشىپ، ءورت تۇتانعان. جانۇشىرىپ جۇگىرگەن قاريانىڭ ايەلى كورشىلەردەن كومەك سۇراپتى. اجەيدى 94 جاستاعى زەينەتكەر ابدەن ساباپ تاستاعان ەكەن. دەنەسىندە ساۋ تامتىعى جوق ول قاريانىڭ گاز باللونىن جارعالى جاتقانىن ايتقان. كورشىلەرى پوليتسيا مەن ءورت ءسوندىرۋ قىزمەتىنە حابار بەرگەن. ولار كەلگەنشە، ءۇي تۇگەل جانىپ كەتتى.
ال گاز باللونىن جارعان ءۇي يەسى باسىن امان الىپ شىعىپ، قوراعا تىعىلىپ ۇلگەرىپتى. ونى قۇتقارۋشىلار جەدەل جاردەمگە تاپسىرعان. زەينەتكەر سول ساتتە ەسىن بىلگەنىمەن، اۋرۋحاناعا كەلگەن سوڭ جاعدايى ناشارلاپ، جانساقتاۋ بولىمىنە جاتقىزىلعان ەدى.
