ەلوردادا 800-دەن استام موپەد جۇرگىزۋشىلەرى جاۋاپكەرشىلىككە تارتىلدى، دەپ حابارلايدى “ادىرنا” ۇلتتىق پورتالى استانا قالالىق ءىىد ءباسپاسوز قىزمەتىنە سىلتەپ.
«قوعامدىق ءتارتىپ پەن جول قاۋىپسىزدىگىن ساقتاۋدىڭ الدىن الۋ جانە جولىن كەسۋ ماقساتىندا ەلوردالىق پوليتسەيلەر موتوتسيكل جۇرگىزۋشىلەرىنىڭ جول قوزعالىسى ەرەجەلەرىن بۇزۋ فاكتىلەرىن انىقتاۋ بويىنشا تۇراقتى جۇمىس جۇرگىزەدى. ەستەرىڭىزگە سالا كەتەيىك، بيىلعى جىلدىڭ باسىنان بەرى جول ەرەجەسىن بۇزعان 833 جۇرگىزۋشى جاۋاپكەرشىلىككە تارتىلدى»، - دەلىنگەن سەنبى كۇنى تاراعان حابارلامادا.
اقپاراتقا سايكەس، جاز مەزگىلى باستالىسىمەن ەلوردا جولدارىندا موپەد تىزگىندەگەن جۇرگىزۋشىلەر قازاقستان رەسپۋبليكاسىنىڭ جول قوزعالىسى ەرەجەلەرىن ءجيى بۇزادى.
وسىعان وراي، استانا قالالىق دەپارتامەنتىنىڭ پوليتسەيلەرى موپەد جۇرگىزۋشىلەرىنىڭ زاڭبۇزۋشىلىقتارىنىڭ جولىن كەسۋگە باعىتتالعان رەيدتىك شارالاردى جۇيەلى تۇردە وتكىزىپ تۇرادى.
«سونىمەن، جۇرگىزىلگەن رەيدتىك ءىس-شارالار بارىسىندا اۆتوپاترۋلدىك پوليتسيا قىزمەتكەرلەرى تاۋلىك ىشىندە 43 جۇرگىزۋشىنى ۇستادى، ولاردىڭ تورتەۋى كامەلەتكە تولماعاندار. جول قوزعالىسى ەرەجەسىن بۇزعانى ءۇشىن 39 جۇرگىزۋشى مەن كامەلەتكە تولماعانداردىڭ ءتورت زاڭدى وكىلى اكىمشىلىك جاۋاپكەرشىلىككە تارتىلدى»، - دەلىنگەن حابارلامادا.
جول قوزعالىسى ەرەجەلەرىن بۇزۋ انىقتالعان جاعدايدا «102» ارناسىنا حابارلاسۋ كەرەك.
