بۇگىن – ديماش قۇدايبەرگەننىڭ تۋعان كۇنى. بەلگىلى ءانشى بيىل 30 جاسقا تولىپ جاتىر.
قازاقستاندىق ونەر يەسى تۋعان كۇنىندە تۇركيانىڭ ىستامبۇل قالاسىندا جەكە كونتسەرتىن وتكىزۋدە. ءانشى Instagram جەلىسىندەگى پاراقشاسىندا ءۇش اي بۇرىن سۇيىكتى تىڭدارماندارىنا قۋانىشتى جاڭالىقتى حابارلادى.
"قۇرمەتتى دوستار! 2024 جىلدىڭ 24 مامىرىندا Stranger تۋرى اياسىندا تۇركيانىڭ ىستانبۇل قالاسىندا جەكە كونتسەرتىم وتەدى. وسى كەشتە ونەردىڭ اسەم الەمىنە قۇشتار، كوڭىلدەرى ىزگىلىككە تولى، دوس پەيىلدى جاندارمەن بىرگە ءان شىرقاپ، تۇتاس ءبىر الەم بولاتىنىمىزعا سەنەمىن! سول ءۇشىن قۋانىشتىمىن", - دەپ جازدى ديماش قۇدايبەرگەن.
تۋعان كۇنىندە ديماشتى قايدان تاپسا بولادى؟
جەلىدەگى وقىرماندار «ساتتىلىك، ديماش!»، «سەن ەڭ كەرەمەت ءانشىسىڭ»، «ناعىز تالانت، وتە مىقتى، تالانت يەسى»، «تۇركياعا ارنايى سەنىڭ كەشىڭ ءۇشىن بارامىز» دەپ جارىسا جازعان.
تۋعان كۇنىندە تانىمال ءارتىس ديماش ىستامبۇلداعى "بەشيكتاش" ستاديونىندا جەكە كونتسەرت وتكىزىپ جاتىر. ديماشتىڭ جەكە كونتسەرتىن ءىرى ءىس-شارالاردىڭ ءوتۋىن باقىلايتىن تۇرىك كومپانياسى ۇيىمداستىرۋدا.
«الەمدەگى ەڭ ەرەكشە داۋىس «بەشيكتاش» ستاديونىندا ديماش قۇدايبەرگەننىڭ 30 جاسقا تولۋىنا ارنالعان كونتسەرت»، - دەپ جازعان كومپانيا جەلىدەگى پاراقشاسىندا.
ديماش قۇدايبەرگەننىڭ رەسمي پاراقشاسىندا 3 كۇن بۇرىن كونتسەرتكە دايىندىق بارىسىنان ءۇزىندى جاريالاندى. ءانشى ءوز جازباسىنا ەشتەڭە جازباسا دا ونىڭ تىڭدارماندارى مىڭنان استام پىكىر قالدىرعان.
ديماشتىڭ جازىلۋشىلارى «كەرەمەت سۋرەت، كوز، شاش، شاش ۇلگىسى... بۇل كىسى كۇننەن كۇنگە جاسارىپ بارادى» دەگەن سىندى پىكىردى كوپتەپ قالدىرعان.
قازاقستاندىق ءانشىنىڭ الەمنىڭ تۇكپىر-تۇكپىرىنەن ءارتۇرلى تىڭدارماندارى بار.
«قانداي كەرەمەت! ءسىزدىڭ 30 جاسقا تولۋىڭىزعا وراي ەڭ جاقسى تىلەكتەر مەن كوپتەگەن لەبىزدەر كەلىپ جاتىر.كەرەمەت كەشتى كورۋ ءۇشىن ساياحاتتاۋعا دەنساۋلىعىمنىڭ مۇمكىندىك بەرمەيتىنى وكىنىشتى! سان-فرانتسيسكودان ءسىزدى قاتتى جاقسى كورەمىن! تۋىلعان كۇنىڭىزبەن، ديماش»، - دەپ جازعان Ari Hancock ەسىمدى ديماشتىڭ جانكۇيەرى.
ديماش ءۇشىن ءوز تەگىن وزگەرتكەندەر بار
ديماش قۇدايبەرگەننىڭ اتىنا ءار ەلدەن فان-پاراقشالار دا اشىلعان.
«بالام! ءبىز سەنى وتە جاقسى كورەمىز! ساتتىلىك، باقىت تىلەيمىز!» - دەپ جازعان galya.1912. ينستاداعى botamankeeva نيكنەيمىندەگى ادام ديماشتىڭ كونتسەرتى ءۇشىن ىستامبۇلعا ارنايى بارعانىن اتاپ ءوتتى.
«ءبىز ىستامبۇلعا كەلىپ الدىق، كونتسەرتتى كۇتۋدەمىز. بىزگە شەكاراشىلار ديماشتىڭ جەكە كەشى ءۇشىن قازاقستاننان ىستامبۇلعا بارا جاتقانداردىڭ كوپ ەكەنىن ايتتى»، - دەلىنگەن پىكىردە.
«قانداي ادەمى ستاديون، ديماش! ءسىز كونتسەرتىڭىز ءۇشىن ەڭ جاقسى ورىندارعا لايىقسىز، ويتكەنى ءسىز كەرەمەت ءانشىسىز. ءوزىڭىزدى كۇتىڭىز، مۇمكىندىگىنشە دەمالىڭىز، جاقسى ۇيىقتاڭىز، دۇرىس تاماقتانىڭىز»، - دەپ ديماشتىڭ كاۆكازداعى تىڭدارماندارى الاڭداۋشىلىق ءبىلدىردى.
«ديماش!! ءبىز ءسىزدى جاقسى كورەمىز، جۇما كۇنىن اسىعا كۇتەمىز!» - دەپ جازعان Dimashfanclubdeutschland پاراقشاسى.
ودان بولەك، چيليدە تۇراتىن شەتەلدىك اندرەيا ەسىمدى قىز ديماشتىڭ ونەرىنە قىزىعىپ، ونىڭ فان پاراقشاسىن جۇرگىزىپ ءجۇر. چيليدە تۇراتىن اندرەا – قازاقستاندىق ءانشى ديماش قۇدايبەرگەننىڭ جانكۇيەرى. ول ءتىپتى ءوز تەگىن قۇدايبەرگەن دەپ وزگەرتىپ العان. ءانشى دومبىرادا وينايتىن جانكۇيەرىنە بىرنەشە ۋاقىت بۇرىن قازاقتىڭ ۇلتتىق اسپابىن سىيلادى. اندرەانىڭ ايتۋىنشا، قارا دومبىرانىڭ شاناعىنا Dimash Qudaibergen دەپ ويىلىپ جازىلعان.
"وزدەرىڭىز بىلەسىزدەر، مەن دومبىرادا ويناۋدى ءوز بەتىمشە ۇيرەندىم، ديماش قۇدايبەرگەن، قازاقستاننىڭ تاماشا اسپاپتارىن الەمگە تانىتقانىڭىز ءۇشىن راحمەت", – دەيدى جانكۇيەر.
ايتا كەتەيىك، ديماش قۇدايبەرگەننىڭ تۋعان كۇنىنە وراي ۇيىمداستىرىلعان كونتسەرتكە بيلەتتەر 9 اقپاننان باستاپ ساتىلىمدا بولعان. ءانشىنىڭ جەكە كەشى بۇگىن ستامبۋلدىڭ ەۋروپالىق بولىگىندە، بوسفور جاعالاۋىندا ورنالاسقان "بەشيكتاش" ستاديونىندا وتپەك. ستاديون سىيىمدىلىعى - 42000 كورەرمەن.
اڭىز ادام، مەسترو ديماش!
دىنمۇحاممەد قۇدايبەرگەنوۆ 1994 جىلى 24 مامىردا ومىرگە كەلگەن. ونىڭ تۋعان قالاسى – اقتوبە. ديماشتىڭ اتا-اناسى تانىمال انشىلەر قانات ايتباەۆ جانە سۆەتلانا ايتباەۆا. ءانشىنىڭ اتا-اجەلەرى دە مۋزىكانتتار.
بۇگىندە بۇكىل الەمگە اتى ايگىلى ءانشى بەس جاسىندا مۋزىكالىق كوللەدج ساحناسىندا العاش ءانشى رەتىندە ءان سالعان. التى جاسىندا “اينالايىن” رەسپۋبليكالىق بايقاۋىنىڭ “فورتەپيانو” نوميناتسياسىندا جەڭىمپاز اتانعان.
2017 جىلدىڭ 15 ءساۋىر كۇنى ديماش قۇدايبەرگەنوۆ قىتايداعى "Singer 2017" جوباسىندا ەكىنشى ورىن الدى. سول بايقاۋدان سوڭ ءانشىنىڭ باعى ەسەلەنگەن. ونىڭ اندەرىن الەمنىڭ تۇكپىر-تۇكپىرىنەن ءسۇيىپ تىڭدايتىن تىڭدارماندار قاتارى كوبەيە تۇسكەن.
قازاق جىگىتى 2019 جىلى "ازيانىڭ ەڭ ادەمى تۇلعالارى" رەيتينگىندە 8-ءشى ورىندى يەلەنگەن. ال 2023 جىلدىڭ جەلتوقسان ايىندا «قازاقستاننىڭ حالىق ءارتىسى» اتاعىن الدى. باق بەتتەرىندە ديماشتىڭ «قازاقستان مەن شەتەل ءتۋريزمىن دامىتۋشى» دەگەن لاقاپ اتى جاريالانعان. سەبەبى قىتايداعى بايقاۋدان سوڭ «ءديماشيدىڭ» ونەرىنە قىزىققان جانكۇيەرلەر ونىڭ تۋعان قالاسى اقتوبەگە ءجيى كەلە باستاعان. سوعان وراي 2018 جىلى «Kazakh Tourism» ۇك» اق ديماشتىڭ اتا-اناسىمەن جانە اقتوبە وبلىسى اكىمدىگىنىڭ تۋريزم، دەنە شىنىقتىرۋ جانە سپورت باسقارماسىمەن بىرلەسە وتىرىپ ءانشىنىڭ دارىنىنا تاڭداي قاققان جانكۇيەرلەرىنە ارنالعان تۋرمارشرۋت قۇراستىرعان بولاتىن.
سىمبات ناۋحان،
«ادىرنا» ۇلتتىق پورتالى
