قۇلسارى قالاسىندا سۋ باسقان 1200-دەن استام ءۇيدى باعالاۋ ناتيجەلەرى دايىندالدى. تەك ءبىر تاۋلىكتىڭ ىشىندە ءموبيلدى توپتار تۇرعىندارعا 300-گە جۋىق باعالاۋ پاراعىن تاراتتى. بۇل تۋرالى توتەنشە جاعدايلار جونىندەگى جەدەل شتاب جاريالادى، دەپ حابارلايدى “ادىرنا” ۇلتتىق پورتالى.
بۇگىنگى تاڭدا جۇمىس كوميسسياسى 1200 نىساندى باعالاۋ ناتيجەلەرىن دايىندادى. ونىڭ ىشىندە ءۇيى سۋعا كەتكەن 357 تۇرعىن وتەماقى الۋ تۋرالى كەلىسىمگە قول قويدى، 109 تۇرعىننىڭ جەكە شوتتارىنا وتەماقى قاراجاتى اۋدارىلدى.
قۇلسارى قالاسىنىڭ تۇرعىنى نۇرشات اۋەلباەۆانىڭ ايتۋىنشا، باعالاۋ كومپانياسى ەسەپتەپ، ۇسىنعان قاراجات ونىڭ ىشكى ەسەبىمەن سايكەس كەلگەن.
«مەنىڭ ءۇيىم اپاتتى دەپ تانىلدى. ول ءۇيدى تەك بۇزۋعا كەرەك. زارداپ شەككەن ءۇيىمنىڭ قۇنىن ءادىل باعالاعاندارىنا ريزامىن، مەملەكەتتەن تۇسەتىن وتەماقى شىعىنىمدى تولىعىمەن جابادى. الىنعان اقشالاي وتەماقىعا جاڭا ءۇي ساتىپ الامىن. نەمەسە جاڭا ءۇي سالۋىم دا مۇمكىن. قازىر ءبىز بۇل ماسەلەنى وتباسىمىزبەن وسى ماسەلەنى تالقىلاپ جاتىرمىز»، - دەدى نۇرشات اۋەلباي.
قۇلسارى قالاسىنىڭ تاعى ءبىر تۇرعىنى كۇنزيرا تاجىعۇلوۆا اقشالاي وتەماقىعا جاڭا تۇرعىن ءۇي ساتىپ الۋعا نيەتتى.
«ءۇيىمدى باسقان سۋدىڭ كولەمى ەكى مەتر دەڭگەيىندە ساقتالىپ تۇردى. اياق استىنان اپاتتىق جاعدايعا جەتكەن ءۇيىمدى ءادىل باعالاعاندارى ءۇشىن راحمەت ايتامىن. ەندى ول ءۇيدى الاڭسىز بۇزۋعا بولادى. ونىڭ ورنىنا جاڭا تۇرعىن ءۇي ساتىپ الامىز دەپ وتىرمىز»، - دەدى كۇنزيرا تاجىگۇلوۆا.
زارداپ شەككەن مۇلىكتى باعالاۋ جۇمىستارىن وسى اپتانىڭ سوڭىنا دەيىن اياقتاۋ جوسپارلانۋدا.
بۇگىندە قالا بويىنشا جيىرما ءموبيلدى توپ كۇشەيتىلگەن رەجيمدە جۇمىس ىستەۋدە. ماماندار ءۇيدى ارالاۋدى جانە زالالدى باعالاۋ مەن زارداپ شەككەن مۇلىككە تەحنيكالىق ساراپتاما قورىتىندىلارىن ءتۇسىندىرۋدى جالعاستىرۋدا. ءموبيلدى توپتاردىڭ جۇمىسى بارلىق باعالاۋ جۇمىستارى تولىق اياقتالعانعا دەيىن كۇن سايىن دەمالىسسىز جۇرگىزىلەتىن بولادى.
قۇلسارى قالاسىنداعى № 20 مەكتەپ بازاسىندا ۇيلەرى اپاتتى دەپ تانىلعان تۇرعىندارعا ءتۇسىندىرۋ جۇمىستارىن جۇرگىزۋ جالعاسۋدا. سونداي اق، سۋ تاسقىنىنان زارداپ شەككەندەرگە اقشالاي وتەماقى تولەۋ بويىنشا اقپارات بەرىلۋدە.
سۋ تاسقىنى كەزىندە زارداپ شەككەن تۇرعىندارمەن ارادا اقشالاي وتەماقى تولەۋ بويىنشا كەلىسىمدەر جاساسۋ بويىنشا جۇمىستار جىلىوي اۋدانىنىڭ مادەنيەت ۇيىندە جۇرگىزىلۋدە.
