قۇلسارى حالقى ءالى دە اكىمدىك الدىندا تالاپ-ارىزىن ايتىپ، تارقاماي تۇر. الەۋمەتتىك جەلىدە اتىراۋ وبلىسىنا پرەزيدەنت كەلەدى دەگەن اقپارات تارادى، دەپ حابارلايدى "ادىرنا" ۇلتتىق پورتالى.
اقوردا پرەزيدەنت قاسىم-جومارت توقاەۆتىڭ قۇلسارىعا ساپارى تۋرالى ەشقانداي اقپارات تاراتپادى.
مەملەكەت باسشىسى 18 مامىردا سۋ باسقان ايماقتارعا قاتىستى پرەمەر-ءمينيستردىڭ ەسەبىن تىڭداپ، اكىمدىكتەر قۇقىق قورعاۋ ورگاندارىمەن بىرلەسىپ، زاڭعا سايكەس قوعامدىق ءتارتىپتى قامتاماسىز ەتۋى كەرەك ەكەنىن تاپسىرعان بولاتىن.
اقوردا اقپاراتىنشا، مەملەكەت باسشىسى كوكتەمگى تاسقىننان زارداپ شەككەن تۇرعىنداردى ساپالى باسپانامەن قامتاماسىز ەتۋگە، قالالار مەن ەلدى مەكەندەردەگى ينفراقۇرىلىمداردى جوندەۋگە جانە قۇرىلىس جۇمىستارىنا كىرىسۋگە قاتىستى تاپسىرما بەردى.
"ۇكىمەت، اكىمدىكتەر قۇقىق قورعاۋ ورگاندارىمەن بىرلەسىپ، زاڭعا سايكەس قوعامدىق ءتارتىپتى قامتاماسىز ەتۋى كەرەك", – دەدى توقاەۆ.
توقاەۆ اتىراۋ وبلىسىندا تاسقىننان قاتتى زارداپ شەككەن اۋماقتاردىڭ ءبىرى قۇلسارى قالاسىندا باسپاناسى تابيعي اپاتتان قيراعان نەمەسە بۇلىنگەن تۇرعىندار تالاپ ايتىپ جاتقان شاقتا مالىمدەمە جاسادى.
اپتا باسىنان بەرى ءۇيىن سۋ باسقان قۇلسارىلىقتار جەرگىلىكتى اكىمدىك الدىنا جينالىپ، وتەماقى تالاپ ەتۋدە. جينالعانداردىڭ ايتارى وتەماقىنى قولما-قول الۋ. اشىنعان حالىق سۋ تاسقىنىنان قۇلاعان ۇيلەرىنىڭ ءاربىر شارشى مەترى "400 مىڭ تەڭگەدەن باعالانىپ، اقشا قولعا بەرىلسىن دەپ تالاپ قويدى. ال جەرگىلىكتى بيلىك ءۇيدىڭ ءار شارشى مەترى 200-240 مىڭ تەڭگەدەن باعالاعان.
