قازاقستان مەن قىتاي شەكاراسىندا بوگەت بۇزىلدى.بۇل اقپاراتتى شىعىس قازاقستان وبلىسى مارقاكول اۋدانىنىڭ اكىمدىگى راستادى، دەپ حابارلايدى “ادىرنا” ۇلتتىق پورتالى.
مارقاكول اۋدانى اكىمدىگىنىڭ مالىمەتىنشە، قازىر بوران اۋىلىندا جاعالاۋدى بەكىتۋ جۇمىستارى قىزۋ جۇرگىزىلىپ جاتىر
"سۋ 2 سانتيمەتردەي كوتەرىلىپ جاتىر. بىراق بۇل تەك وسى اۋىل اۋماعىندا. ول جەردە جۇمىس ءالى ءجۇرىپ جاتىر. ۋچاسكەدە 24 ساعاتتىق ۆاحتا ۇيىمداستىرىلدى. ولاردا كولىك، قايىق، بارلىق قاجەتتى قۇرال-جابدىقتار بار. اۋدان اكىمى وقيعا ورنىندا، اۋداندىق توتەنشە جاعدايلار قىزمەتىنىڭ باسشىسى سول جەردە", - دەدى مارقاكول اۋىلدىق وكرۋگى اكىمى اپپاراتىنىڭ باس مامانى اسەم بولىسوۆا.
بۇگىن، 22 مامىرداعى سۋ رەسۋرستارى جانە يرريگاتسيا مينيسترلىگىنىڭ مالىمەتىنشە، قىتاي تاراپى ترانسشەكارالىق وزەندەر بويىنان 1400 م³/س اعىن جىلدامدىعىمەن سۋ اعىزىپ جاتقانىن حابارلادى.
«ءبىز قىتايدان كەلگەن ارىپتەستەرمەن بايلانىستامىز. ەلدى مەكەندەردى سۋ باسۋ قاۋپى جوق. قارا ەرتىس (ەرتىس) وزەنىندە بوران كەنتىندەگى باقىلاۋ-ولشەۋ ستانساسى ايماعىنداعى سۋ اعىنى 1700-1400 م³/س بولسا، قازىر سۋ دەڭگەيى 543 سانتيمەتردى قۇراپ وتىر.
بىراق بۇل ايماقتا سۋ دەڭگەيى كوتەرىلەدى دەپ كۇتىلۋدە. شىعىس قازاقستان وبلىسى «قازۆودحوز» فيليالىنىڭ ماماندارى كۇشەيتىلگەن رەجيمگە كوشىرىلدى. وسكەمەن سۋ قويماسىنان (بۇقتىرما سۋ قويماسىنىڭ قارسى رەتتەگىشى) سۋ توگۋ 500-دەن 800 م³/س-قا دەيىن ۇلعايتىلدى. جاعداي ءمينيستردىڭ ەرەكشە باقىلاۋىندا»، - دەپ حابارلادى ۆەدومستۆونىڭ ءباسپاسوز قىزمەتى.
ەرتەڭ نۇرجان نۇرجىگىتوۆ شىعىس قازاقستان وبلىسىنا اتتانادى. بۇگىندە وبلىستا ۆيتسە-مينيستر الدامجاروۆ جۇمىس ىستەيدى، دەپ قوستى ۆەدومستۆودان.
