تارازدا پوليتسەي قىزمەتكەرى سۋعا تۇنشىعىپ قالعان بالانى قۇتقارىپ قالدى، دەپ حابارلايدى “ادىرنا” ۇلتتىق پورتالى.
ەكى جاسار ءسابيدى قۇتقارۋ ءساتىن كومەككە اسىققان قىزمەتكەردىڭ ۆيدەوكامەراسى ءتۇسىرىپ العان. ىشكى ىستەر مينيسترلىگىنىڭ مالىمەتىنشە، بالا ايشا ءبيبى كوشەسىنىڭ بويىمەن اعىپ جاتقان كانالعا قۇلاپ كەتكەن.
بالانى سۋدان ءوتىپ بارا جاتقان ادام الىپ شىققان. جەدەل جاردەم كەلگەنگە دەيىن پاترۋل قىزمەتكەرى نارەستەگە 10 مينۋت بويى جۇرەك-وكپە رەانيماتسياسىن جاسادى.
«بالا مۇلدەم تىنىس الماي جاتسا دا، مەن سوڭىنا دەيىن كۇرەستىم، توقتاۋسىز جۇرەككە ماسساج جاسادىم، بىزگە ۇيرەتكەن بارلىق داعدىلاردى قولداندىم جانە ءبىر كەرەمەت جاعداي ورىن الىپ، وكپەدەن سۋ شىقتى، بالا دەم الا باستادى»، - دەدى تاراز قالاسى بويىنشا پد ينسپەكتورى داۋرەن قولقاەۆ.
ەكى جاسار بالا وبلىستىق بالالار اۋرۋحاناسىنا جەتكىزىلدى، قازىر ونىڭ ومىرىنە قاۋىپ ءتونىپ تۇرعان جوق.
