قر تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى سۋ تاسقىنىنا بايلانىستى ءىرى ءىس-شارالاردان باس تارتۋ تۋرالى پرەزيدەنت تاپسىرماسىنا سايكەس، Digital Bridge 2024 حالىقارالىق ءىت-فورۋمىن وتكىزۋدەن باس تارتتى. فورۋم استانادا وسى جىلدىڭ 5-7 قىركۇيەگىنە جوسپارلانعان بولاتىن، دەپ حابارلايدى “ادىرنا” پورتالى Kaz.inform.kz سايتىنا سىلتەپ.
Digital Bridge 2018 جىلدان بەرى IT-يندۋستريانىڭ سوڭعى تەندەنتسيالارى مەن دامۋ پەرسپەكتيۆالارىن تالقىلاۋعا ارنالعان ورتالىق ازياداعى ەڭ ءىرى الاڭ بولىپ كەلدى. بۇل فورۋم تەك 2020 جىلى توتەنشە جاعدايدا – جاھاندىق COVID-19 پاندەمياسىندا وتكىزىلگەن جوق.
«بيىل كوكتەمدەگى سۋ تاسقىنى قازاقستانداعى سوڭعى 80 جىلداعى ەڭ ءىرى تابيعي اپات بولدى. وسىعان بايلانىستى، اۋقىمدى قيراتۋ سالدارىن جويۋ جانە ەل ازاماتتارىنا كومەك كورسەتۋ ءۇشىن قاراجاتتى ۇنەمدەۋ ماقساتىندا مەملەكەت باسشىسى ۇكىمەتكە جوسپارلانعان يميدجدىك جانە باسقا دا ءىرى ءىس-شارالاردى وتكىزۋدەن باس تارتۋدى تاپسىردى. Digital Bridge ۇيىمداستىرۋشىلارى فورۋمعا قاتىسۋعا مۇددەلى بارلىق ادامدارعا العىس بىلدىرەدى. قولايلى جاعدايلاردا Digital Bridge حالىقارالىق IT-فورۋمى ءوز جۇمىسىن 2025 جىلى قايتا باستايدى»، - دەپ حابارلادى مينيسترلىك.
بۇعان دەيىن مەملەكەت باسشىسى 13-14 ماۋسىمعا جوسپارلانعان استانا حالىقارالىق فورۋمىن وتكىزبەۋ تۋرالى شەشىم قابىلداعان ەدى. سونداي-اق، ونەركاسىپ جانە قۇرىلىس مينيسترلىگى 25-26 ساۋىرگە جوسپارلانعان قازاقستان ماشينا جاساۋشىلارىنىڭ ءحىى فورۋمىن ۋاقىتشا توقتاتتى.
