مەملەكەت باسشىسى قاسىم-جومارت توقاەۆ حالىقارالىق بەيبىتشىلىك جانە سەنىم جىلىنا، حالىقارالىق بەيتاراپتىق كۇنى مەن تۇركىمەنستاننىڭ تۇراقتى بەيتاراپتىعىنىڭ 30 جىلدىعىنا ارنالعان فورۋمعا قاتىستى. بۇل تۋرالى بۇگىن، 12 جەلتوقساندا اقوردانىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
پرەزيدەنت تۇركىمەنستاننىڭ بەيتاراپ ساياسي ۇستانىمى تۇرىكمەن حالقىنىڭ سان عاسىرلىق مادەني داستۇرىمەن جانە رۋحاني قۇندىلىقتارىمەن ۇيلەسەتىنىن ايتتى.
«تۇركىمەن كلاسسيكالىق ادەبيەتىنىڭ نەگىزىن قالاۋشى، شىعىستىڭ كورنەكتى ويشىلى ماقتىمقۇلى پىراعى: «تىنىشتىق بولسا ەل وسەدى، ادىلدىك بولسا سەنىم كۇشەيەدى» دەگەن. ۇلى دانىشپاننىڭ دۇنيەنى تەرەڭ تانىعان يدەيالارى قازىرگىدەي الماعايىپ حالىقارالىق جاعدايدا دا وتە وزەكتى بولا تۇسكەنى ءسوزسىز»،- دەدى قاسىم-جومارت توقاەۆ.
ول فورۋمدا اۋعانستانعا كومەك كورسەتۋدى جالعاستىرۋ قاجەت دەپ ەسەپتەيتىنىن جەتكىزدى.
«الماتىداعى ورتالىق ازيا مەن اۋعانستانعا ارنالعان ورنىقتى دامۋ ماقساتتارى جونىندەگى بۇۇ وڭىرلىك ورتالىعى وسى باعىتتاعى ىنتىماقتاستىقتى ۇيلەستىرەتىن ماڭىزدى پلاتفورماعا اينالدى. تۇراقتىلىق پەن قاۋىپسىزدىكتى نىعايتۋدا ازياداعى ءوزارا ءىس-قيمىل سەنىم شارالارى جونىندەگى كەڭەس ماڭىزدى ءرول اتقارادى. بۇل فورۋم ءوزىنىڭ ساياسي تۇرعىدان وزەكتىلىگىن دالەلدەدى. وسىعان وراي اوسشك قىزمەتىنە، سونىڭ ىشىندە فورۋمدى تولىققاندى حالىقارالىق ينستيتۋتقا اينالدىرۋعا قولداۋ كورسەتكەنى ءۇشىن سەرىكتەستەرىمىزگە العىس ايتامىز»،– دەدى مەملەكەت باسشىسى.
