بۇگىن، 18 ساۋىردە ۆيتسە-پرەمەر قانات بوزىمباەۆ الماتىدا سەيسميكالىق قاۋىپسىزدىكتى قامتاماسىز ەتۋ بويىنشا كەڭەس وتكىزدى، دەپ حابارلايدى «ادىرنا» ءتىلشىسى ۇكىمەتتىڭ ءباسپاسوز قىزمەتىنە سىلتەمە جاماپ.
عيماراتتاردىڭ سەيسميكالىق تۇراقتىلىعىن ارتتىرۋ بويىنشا قابىلدانىپ جاتقان شارالار تۋرالى ونەركاسىپ جانە قۇرىلىس ءمينيسترى قانات شارلاپاەۆ ەسەپ بەردى. ول سەيسميكالىق دەڭگەيى 7-9 بالل بولاتىن الاڭداردا تۇرعىن ۇيلەر مەن الەۋمەتتىك نىساندار سالۋ كەزىندە سەيسميكالىق وقشاۋلاۋدىڭ مىندەتتى جۇيەسىن ەنگىزۋ تۋرالى باياندادى.
قانات بوزىمباەۆ حالىقارالىق تاجىريبەنى، ونىڭ ىشىندە جاپون تاجىريبەسىن ەسكەرە وتىرىپ، سەيسميكالىق قاۋىپتى وڭىرلەردەگى نىسانداردى جوبالاۋ كەزىندە نورمالاردى قاتاڭداتۋ جۇمىستارىن جۇرگىزۋدى، سونداي-اق اككرەديتتەلگەن زەرتحانالاردى قولدانا وتىرىپ، قۇرىلىس نورمالارىنىڭ سايكەستىگىن قاداعالاۋدى كۇشەيتۋدى تاپسىردى.
الماتى اكىمى ەربولات دوساەۆ قالادا 1 ماۋسىمعا دەيىن Mass Alert جۇيەسىنىڭ پيلوتتىق رەجيمدە ەنگىزىلەتىن ايتتى. جاڭا جۇيە توتەنشە جاعداي تۋىنداعان ساتتە ازاماتتاردى ۋاقىتىلى حاباردار ەتپەك.
ۆيتسە-پرەمەر حالىقتى شۇعىل حاباردار ەتۋ جۇيەسىن ىسكە قوسۋ پروتسەسىن جەدەلدەتۋدى تاپسىردى. اتالعان جۇيە ەلىمىزدىڭ جەر سىلكىنىسى قاۋپى بار بارلىق وڭىرلەرىندە بولۋى جانە ۇزدىكسىز جۇمىس ىستەۋى قاجەت.
سونداي-اق قانات بوزىمباەۆ جەر سىلكىنىسى بولعان جاعدايدا حالىقتى اقپاراتتاندىرۋعا، قۇتقارۋ جانە ەۆاكۋاتسيالىق ءىس-شارالاردى ۇيىمداستىرۋعا، جىلجىمالى دالالىق گوسپيتالداردى ورىستەتۋگە قاتىستى مەملەكەتتىك ورگانداردىڭ ءىس-قيمىل الگوريتمىن تىڭدادى.
